Ich Toman von Praitenpuch und mein hausfraw verjehen, daz wir gelten schuellen dem erbergen herren hern Dietmarn probst ze Reichersperg und dem gotzhaus daselb zehen mu^ett traides fuenf mu^ett chorns und fünf mutt haberns Neunsteter mazz der wir sew richten und wern schnellen vor sand Merteins tag der schirst chuemt in di Neunstat an all ir mue in ein herberig wo uns der pfarer von Pramperch bin zaigt. Wir sein in auch dez traides schuldig warn von irm tail zehentz ze Praitenpuech den wir darumb bestanden haben ze flust und ze gwin von hinn üntzt auf di liechtmezz di schirst chömt den ainen nütz, und fürbaz hab wir nicht mer darauf ze sprechen weder wenig noch vil. Waer aber daz Got nicht engeb, daz dem vor genanten gotzhaus der egenant hof ze Praitenpuech und auch der zehent den wir ze leibgeding haben inner der frist mit dem tod ledig wurd, so schol ich vor genanter Toman den hof und den selben tail zehentz auch inn haben üntzt auf di liechtmezz in dez gotzhaus namen und mit irs pfleger hant, wer der ist ze den selben zeiten, und schol ich gein dem probst und gein dem gotzhaus dar umb leiden nach vier mann rat der im yeder tail zwen nimt, und waz di dar umb sprechent, da schol ez gaentzleich pey beleiben. Und seind wir aigens insigel nicht haben, geb wir in den prief versigelten mit dez erbern manns Wuelfings dez Stikchelperger anhangendem insigel. Der geben ist nach Christes dreutzehenhundert jar darnach in dem siben und sechtzigisten jar an sand Mathyas tag dez heiligen zwelif poten.

Source Fulltext: OÖUB 8 (Wien 1883) Nr. 316, S. 311f.