Ich Hans der Freye^ar vergich fur mich und all mein erben, daz ich durch meins lieben swager Ulreichs dez Hunthohen dem Got gnad und durch meiner lieben hausfrawn Gueten der auch Got gnad sel willen und durch aller irer vodern sel recht und ledichleich han geben den erwirdigen hern von Reychersperg in di oblay daz guet datz A^etzing gelegen in Ryede^ar gericht alzo mit der beschaiden, daz di obverschriben erwirdigen hern alleu jar jaerleich an sand Symons und an sand Judas tag sullen begen der obverschriben seligen hugnuzz und jartag, dez nachtes mit der vigilii und der morgens mit der selmezz mit gantzem und vollem chor alzo daz sitleich und gewonleich ist. Auch hab wir in daz obverschriben guet datz A^etzing alzo daz oben beruert ist geantwurt in ir nutz und gewer mit stifft und mit sto^er und mit aller der sta^et, und dar zue geho^ert mit Chu^entzleins dez Huntho^ehen und mit aller erben gunst und willen, und sein dez ir gewer und furstand fuer ir freyes und ledigs guet an aller der stat und in dez not geschiecht alzo dez landes recht ist, und so^ell wir noch niemt von unser wegen si an dem obverschriben guet nimmer mer geengen noch geirren weder mit recht noch an recht weder geistleich noch wertleichem noch mit dhainerlay zuespruechen noch irrung wi di gnant mochten gesein, und waz wir oder yemt von unsern wegen darumb mit in chriegen oder muetwillen oder rechten wolten, da sol si mein her von Ahaim oder wer pfleger datz Ryed ist vor fristen und frein, und su^ell wir da nichtz widerreden noch tuen in dhainer weis. Und daz den erwirdigen hern daz alzo sta^et beleib, gib ich in den brief mit meim obenantz Hansen dez Freye^ar und mit meins gnedigen hern hern Gorgen von Ahaim und hern Thomans dez Appfelthaler und Chunratz dez Lawer anhangenden insigeln. Darunder ich mich und all mein erben und Chuntzel dez Hunthoch und all sein erben ze sampt uns verpintent mit unsern trewn alz daz sta^et ze haben daz oben geschriben stet. Datum et actum anno domini millesimo (ccc/mo Ix nono) trecentesimo sexagesimo nono in die sancte Katerine virginis et martiris.

Source Fulltext: OÖUB 8 (Wien 1883) Nr. 448, S. 440f.