Ich Elzpet Gerleyns an dem Huntzpuchel purger ze Pazzow hausfraw vergich, daz ich mich veraint und betaydingt han mit den erwirdigen hern dem convent von Reychersperg umb di hoffstat und purchrecht, daz gelegen ist in dem innern marcht ze Obernperg ze nachst Otten dez Stuechklaer hoffstat und Hainreichs dez Sleycher saeligen hoffstat also mit aus genomen worten und auch mit der beschaiden, daz ich oder wem ich di obenanten hoffstat und purchrecht gib oder lazz oder wer daz inn hat ez sey gepawt oder ungepawt, den obverschriben hern ewichleich da von raychen und geben schuellen ze rechtem hoffzyns allew jar jaerleich an sand Michels tag an allen abslach und widerred fuenff schilling und zehen pfennig allez wienner pfennig. Waer aber ob wir in oder wer daz purchrecht di weil inn hiet den zyns allew jar nicht gaeben an sand Michels tag, so habent di obverschriben hern von Reychersperg oder ir pot vollen gewalt dar auf ze pfenten und in dar umb ze sperren alzo der hoffmarich recht ist ze Obernperg, und sol si da niempt inn engen noch irren in dhainer weis. Waer aber ob in der zyns versezzen wurd und daz in der an sand Michels tag nicht geben wurd, so gent je nach viertzehen tagen zehen wienner pfennig dar auf ze wandel. Waer aber daz in zyns und wandel alz lang versezzen wurd, von wietan sachen daz geschaech untz daz daz purchrecht nicht mer tragen mocht, so muegen sich da di obverschriben hern under ziehen und underwinden, ez say gepawt oder ungepawt mit recht oder an recht, und muegen irs ewigen zynses und irs versezzen zynses und auch der wandel di dar auf gangen waern da von bechoemen alz si pest muegen, und sol si di herschafft der pfleger der richter und di purger dar zue scherm und schnellen auch dez gen aller maenchleich unentgolten sein. und wer der ist der daz purchrecht inn hat der sol nichtz da weder reden noch tuen in dhainer weis, und sol auch daz purchrecht verwachten verstewrn und pawn den hern an allen schaden und unentgolten irs ewigen zynses, und wer der ist der daz purchrecht verchumern wil der sol daz all zeit tuen nach der hern rat. Ez suellen auch di obverschriben hern von Reychersperg alleu jar jaerleich begen ein jar tag ewichleich an sand Agnesen tag, hintz nacht mit vigilii und dez morgens mit einer selmezz alzo pey dem gotzhaus sitleich und gewontleich ist, Ulreichen dem Hunthoch saeligen und sein vodern und nachomen. Und daz daz den obenanten hern von Reychersperg ewichleich und irn nachomen alzo staet und unzerbrochen beleib, gib ich den brief zue einer ewigen urchuend mit dez erbern hern hern Haertneides dez eltern Chuchlaer di weil pfleger ze Obernperg und Petern dez Tuemair und Hylprantzz dez Weygzelberger und Wolffhartz dez Lazzaer di zeit richter ze Obernperg anhangenden insigeln, dar under ich mich obenantew Elzpet und alle die di daz obverschriben hoffstat oder daz purchrecht inn habent verpint, alz daz staet ze haben ewichleich daz oben an dem brief verschriben stet. Der sach sind zeug und taydinger gewesen Chunrat Lawaer und Hans und Leupolt di payd Tuemair Chunrat der Stochaimer Meyngoez von Holtz Leupolt der Lueger Ott der Stuechklaer Chunrat der Stetnaer und ander erber laewt genueg. Daz geschach in offner schrann ze Obernperg nach Christi gepurd dreutzehen hundert jar darnach im fünff und sybentzgistem jar dez mitichen vor Marie Magdalene tag.

Source Fulltext: OÖUB 8 (Wien 1883) Nr. 749, S. 771ff.