Reverendis in Christo patribus, dominis et amicis suis karissimis, domino . . venerabili preposito totique capitulo monasterii in Reichersperg Petrus permissione divina prepositus et archidiaconus, Christoforus decanus totusque conventus ecclesie Seccoviensis, cum oracionum frequencia, fraternam in Domino Karitatem. Verus quia religionis ordo principaliter hoc exigit et requirit, ut sub eo militantes, mutuis consolationibus, se invicem preveniant fidelique obsequio caritatis, ut que nexu carnalis amoris hic fideliter conjunguntur, solutis corporibus etiam in spiritu fideliter congregentur, Nos igitur Petrus prepositus et archidiaconus prefatus totusque noster conventus ecclesie Secco- viensis pro nobis et pro omnibus nobis succedentibus, matura deliberatione prehabita, in nostram confraternitatem recipimus, libenter et liberaliter, juxta peticionis affectum Reverendi domini domini prepositi ac totius capituli monasterii in Reichersperig, nunc in vita manentibus et in futurum supervenientibus, facientes eos, omnium bonorum, quae per nos et successores nostros in ecclesia nostra, adjuvante Deo, qui est omnium bonorum largitor et auctor, fiunt et fieri poterunt, in vita pariter et in morte, participes, fraternitatem eandem sic firmare volentes, ut si qui fratrum nostrorum, fraterne caritatis gracia, vel alio quocunque casu alterutrum visitare voluerint, prebenda que ibidem fratribus ministrari solet, integraliter percepturi. Praeterea statuimus, ut cum aliquis ex vestro consortio, vocante Deo, decesserit, et nobis nunciatus fuerit, obitus quem Dominus felicem faciat, decanus, auditu obitu fratris defuncti, ceteris fratribus mane in capitulo intimabit, quo facto, decanus nomen defuneti statim asscribi faciat libro mortuorum. Jn eadem eciam nocte, si festum alicujus sancti non impediat, majores vigilie cum solempni conpulsacione cantentur, et missa pro defunctis mane celebretur. Missas nichilominus aliis fratribus legentibus in sequestro et infra trecenarium, quilibet sacerdotem, tres missas, non conputata eadem missa, que in deposicione ipsius dici debuit, pro defuncto celebretur, alii vero infra sacerdocium existentes, pro eodem vigilias legant, et mane in missa fiat commemoracio specialis. Dantes vobis in testimonium premisse confraternitatis has literas nostras et nostrorum sigillorum munimine roboratas. Datum Seccovie anno domini millesimo trecentesimo septuagesimo septimo in die sancti Bernhardi confessoris.

Source Fulltext: OÖUB 9 (Wien 1906) S. 297-298