Johannes Dei gratia episcopus Patauiensis dilecto in Christo Wernhardo ad presens vicario parochialis ecclesie sancti Floriani prope Schärdingam nostre diocesis salutem in domino. Pro parte dilectorum in Christo decani et conuentus monasterii in Reichersperg ordinis sancti Augustini canonicorum regularium dicte nostre diocesis nobis extitit propositum necnon significatum ac debita cura instancia supplicatum, quod vacante nuper iam dicto eorum monasterio per obitum bone memorie Dietmari ultimi praepositi monasterii memorati, ipsi decanus et conuentus ad electionem futuri praepositi procedentes dilectum in Christo Griffonem dictum Ottenperger canonicum et professum eiusdem monasterii in suum et dicti monasterii prepositum et prelatum canonice et concorditer elegerunt, quatenus eleccionem eandem tamquam canonicam et concorditer celebratam confirmare auctoritate ordinaria dignaremur. Porro ne contra doctrinam apostolicam cito manus imponere videamur, tibi in virtute sancte obedientie precipimus firmiter et mandamus, quatenus ad dictum monasterium personaliter accedens ibidem proclamationem seu citationem facias generalem, ut, siqui sit vel sint, qui contra formam eleccionis huiusmodi aut personam electam aliquid dicere seu opponere habuerint seu voluerint, in die beate Margarete virginis proxime Ventura pro omnibus dilacionibus et termino peremptorio ad hoc deputata mane hora terciarum coram nobis Patauie compareat seu compareant ad dicendum et opponendum in premissis et aliter faciendum, prout qualitas negotii huiusmodi exigit et requirit. Alioquin in petite confirmationis negotio, ut iustum fuerit, procedemus cuiusquam absentia non obstante. Diem vero proclamacionis seu citacionis tue et quidquid in premissis feceris, nobis litteris tuis remissis presentibus fideliter studeas intimare. Datum ibidem Patauie sub appressione minoris sigilli nostri die VI. mensis Julii anno Domini millesimo trecentesimo octuagesimo sexto.

Source Fulltext: OÖUB 10 (Wien 1933) S. 383-384