Ich Dyetreich Hofer zum Lobenstain die zeit pfleger zw Scherding bekenn offenlich mit dem brief umb die zuespruch vodrung und ansprach, die Lyendel und Chunczel gebrueder dy Zeller aus der Riedaw habent hincz dem ersamen geistlichen herren brobst Greiffen und hintz seinem gotzhaws zue Reichersperg, darumb die Zeller und auch der von Reichersperg sich willichleich verviengen eins frewntleichen tags fuer mich gen Scherding und suechten auch den zu bayder seytt auf dem Mawtthaws daselbs. Do kom fuer Liendel Zeller mit chlag und sprach, in hieten die Sakcheymer gevangen und ser verwundet von des gotzhawss wegen zue Reichersperg, des er grozz verderibleich schaden genomen hiet. Darüber antwurtt im der von Reichersperg und sprach, er und sein gotzhaws warn unschuldig an seiner vänkchnuzz und an seinem verderben und darumb wolt er gern gerecht werden vor mir und do er ez pilleich tun solt. Da rieten erber ritter und knecht, dy sy aus baiden tayln mit in auf den tag bracht heten, in selten die Zeller verpuntenlich nemen drey und der von Reichersperig des geleichs. Des volgten sy veraintleich auf beyden taylen und die Zeller namen hern Christann den Ramstorffer, die zeit pfleger am Newnhaws gegen Scherding über, Petern Rämppeltzheimer und Heinreich den Pirchinger zue Sighartting, der von Reichersperg nam hern Wilhalm und Steffan gebrüder die Mawtter zue Chatzenperg und Wilhalm den Aheymer zum Newnhaws und paten mich auf baiden tayln mit allem vleizz zu einem obman, das ich nicht gern tet und doch ward ich sein geweyset von bidern lewtten. Do versprachen di Zeller und auch der von Reichersperig den sechsen und auch mir als einem obman mit irn trewn, was wir umb allen obverschriben hanndel nach ir bayder weisung mit worten oder mit brifen zwischen in erfunden und sprächen, das wär mit der minn oder mit dem rechten, daz wolten sy trewlich und gänczlich stät haben an geverde. Nach dem selben santt der von Reichersperg meinen richtter Petern den Chalbekchen und ander piderb lewtt zu Liendlein dem Zeller und hies mit im reden, ob er anders yemant in seinen tädingen wolt haben oder ob er mit im ain täding wolt. Do antwurtt der Zeller und sprach: er wolt nur von seinen und seins bruder Chuenczleins des Zeller wegen täding und von nyempt anders. Darnach und desselben abentz ward ez zu spat, das wir nicht ausgesprechen mochten. Des morgens sambten wir uns die sechs und auch ich und wolten ausgesprochen haben, als ez vor hinder uns komen waz. Do komen die Zeller und ir Spruch lewtt und brachten ettleich artikel für, der am abent, do sy hinder giengen, nye nichtz von geredt ward, und wolten uns nicht aussprechen lazzen und giengen des hindergangs parleichen aus. Nach demselben kom der von Reichersperg mit erbern rittern und knechten und sprach, er wolt gern bei dem hindergang beleiben, als er dez sein trew geben hiet, seind aber die Zeller des hindergangs ausgegangen wän, da ruefft er mich ernstlichen an von der herschafft pfleg und von der rechten wegen. Ich gab im des meinen brief, den ich im und seinem gotzhaws zue urkunt und zue einer zeugnuzz gib besigelten mit meinem anhangundem insigel mir und allen meinen erben an allen schaden. Geben am nächsten Suntag vor aller Heiligentage nach Christi gepurd drewczehen hundert iar darnach in dem zway und newnczigistem iare.

Source Fulltext: OÖUB 11 (Wien 1983) S. 125-127