(Chrismon.) In nomine sanctae et indiuiduae trinitatis. Heinricus diuina fauente clementia rex. Notum sit omnibus fidelibus nostris presentibus scilicet et futuris, qualiter nos per interuentum dilecte coniugis nostre Cunigunde pro remedio animae nostrae uel parentum et antecessorum nostrorum memoria cuidam monasterio sancti floriani martiris iuxta ripam fluminis, quod dicitur Ippha, constructo quandam nostrae proprietatis hobana prope eandem ripam sitam dono contulimus et insuper quicquid fratribus ibidem deo famulantibus olim pro beneficio concessimus cum omnibus eidem predio iuste et legaliter pertinentibus mobilibus et immobilibus, areis, aedificiis, agris, terris cultis et incultis, pratis, pascuis siue compascuis, siluis, uenatonibus, aquis aquarumque decursibus, piscationibus, molendinis, portu et portatico, uiis et inuiis, exitibus et reditibus, quesitis et inquirendis ac ceteris, que quolibet modo uocari possunt utensilibus et appendiciis eo tenore, quatinus predicti fratres suam tantum et monasterii inopiam inde aliquatenus releuent et pro nobis deum et sanctum florianum attentius exorent. Et ut haec nostrae traditionis (confirmatio?) stabilis et inconuulsa permaneat, hanc precepti paginam conscriptam manu propria roborantes sigilli nostri inpressione signari iussimus. Signum domni Heinrici (Monogramma) regis inuictissimi. egilbertus cancellarius uice uuilligisi archi-capellani recognoui. Data XIII. Kalendas augusti. Anno dominice incarnationis M.II. Indictione XV. Anno uero domni Heinrici regis I. Actum Kirichberge.

Source Fulltext: OÖUB 2 (Wien 1856) S. 70-71