Ich Peter von Hartheimen hern Chunrates sun von Hartheimen tvn chunt allen den, di disen brief sehent oder vernement, daz ich mich aller dinge mit gutem willen mit hern Chunraten von Chappelle verebent han vmb den hof ze zilech, einen Hof bi der Inne, ein Mvl bi der Inne, zwai visch lehen bi der Inne, ein halbez Lehen bi dem Wartperge, zwen Wingarten ze Chritzendorf vnd vmb den Acher ce Ebelsperch vnd zwo wis ze Alnsvelde vnd ein wis ze Pavngarten vnd pin mit guten willen gestanden mines tailes von dem vor genanden gut von allev dev, vmnd (sic) mich sin an erbet oder noch erben solt, vnd pin ovch mines tailes sin gewer als ich ze rehte sol vnd des gutes, des hie niht benant ist, ez si versucht oder vnversucht, daz wir vns des verslihtet haben vmb sin gut. Des sint gezevch her Wichart von polnheimen, her Ortolf, her Hainrieh, her pfilippe, her Alber von polnheimen, Her Otto von volchensdorf, her Eberhart von Walsse, her Heinrich von Walsse, her Heinrich von Volchensdorf, her Heinrich von Lonstdorf, her Chunrat von Volchensdorf, her Rudolf von Alhartinge. Daz ist geschehen ze Wels, do von Christes geburt waren Tovsent iar vnd zwai Hundert iar vnd Nev°nzich iar an sand Katherinen tage.

Source Fulltext: OÖUB 4 (Wien 1867) S. 139, Nr. 146