Nos Vlricus diuina miseracione prepositus, Einwicus Decanus Totusque Conuentus Domus sancti Floriani scire volumus vniuersos presentis pagine inspectores, quod Vlricus de Sinzenperge vir prouidus et honestus in bona ualitudine sui corporis, accedente etiam consensu vxoris sue domine Perihte nec non omnium heredum suorum legauit Ecclesie nostre pro remedio animarum suarum, sui videlicet et vxoris sue prefate ac omnium antecessorum suorum duo predia secus Barrochiam Weiztra sita VII solidos minus x. denarios annuatim soluencia, proprietatis titulo perpetuo possidenda, Tali condicione, ut quam diu diuina clemencia sibi et vxori sue presenti concesserit frui vita, censum annuum, x videlicet denarios nostro Infirmario, cui de eisdem prediis ordinare licebit, annis singulis pro signo proprietatis soluere teneantur. Si autem alter eorum vinculis carnis fuerit dissolutus, Magister Infirmorum vnum predium continuo sibi uendicabit. In cuius etiam anniuersario prouentus eiusdem predii distribuet inter fratres superstite predictum censum de predio residuo nichilominus exhibente, vt autem ambo uocante domino viam carnis ingressi fuerint vniuerse, memoratus Infirmarius de vtroque predio se protinus intromittet Et facta inter fratres distribucione premissorum denariorum dies anniuersarii ipsorum pariter conscriptorum celebrabitur, quemadmodum vnius de Consorcio sacerdotis. Quod si forte per negligenciam aliquam fieret pretermissum et ad exhortacionem heredum suorum vel Consanguineorum suorum correctio differretur, senior heredum suorum tanto tempore sibi tenebitur eadem predia vsurpare, quoadusque negligentia prehabita fuerit emendata facta quoque emendatione nichil iuris heredibus suis amodo competit prediis in eisdem. Et ne super huiusmodi donacione Ecclesia nostra molestiam siue calumpniam aliquam in posterum paciatur, presentem litteram sibi dedimus sigillorum nostrorum munimine roboratam Testibus annotatis, Qui sunt Dominus Heinricus de volchenstorf, Dominus Livtoldus de Walde, Dominus Otto, Arnoldus, Albertus de Wolfstain. Albertus de Walde, Richerus Zwickel, Vlricus Junior de Sinzenperge Et plures alii, qui eidem facto interfuerunt, audiuerunt pariter et uiderunt. Acta sunt hec Anno domini Millesimo CC°. Nonagesimo IIII°. Ydus Nouembris.

Source Fulltext: OÖUB 4 (Wien 1867) S. 214-215, Nr. 234