Ich Hainrich von volchenstorf heren Dietrichs svn tven chvnt an disem brief allen den, di in lesent oder hoerent lesen, daz ich mit verdachtem mvet, gesunter vnd lembtiger mit meiner vriunt rat vnd guetem willen gegeben han dem gotshavs datz sand florian ze ainem selgret meiner sel zwai guet, di genant sint ainz an dem ziechenperg vnd daz ander in der awe, da sein gelaitez wazzer vber get. vnd daz dem vorgenant gotshaus von meinem gerben oder von meinen vriunten vurbaz dehain chrieg vnd chain ansprach vmb di hie benanten guet icht auf ste, gib ich im disen brief ze ainem vrchvnd versigelt mit meim insigel vnd ze pezzer bestetigvng mit meins vetern insigel hern heinrich von volchenstorf mit den zivgen, di hie benant sint: hern Rueger von hutt, her Espein von hag, her perichtold von harthaim, herbort der Chremstorfer, Ott von perichaim vnd ander biderb levt, den iz chvnt vnd gebizzen ist, vnd ist geschechen, do von Christ gebuert vergangen waren drevzechen hvndert Jar, dar nach in dem ainleuften Jar an sand Merteins tag.

Source Fulltext: OÖUB 5 (Wien 1868) S. 65, Nr. 62