Ich Vlrich von Grvnneburch vergich offenlich vnd tven chvnt allen den, di nv lebent vnd her nach chvnftich werdent, di disen prief an sehent vnd avch ho^erent lesen, daz ich mit verdahtem mvet vnd mit aller meiner erben gvetlichem willen vnd gvnst ein aigenschaft an einem lehen datz Mavlspach, die ich vnd mein vor vodern inne haben gehabt vnversprochen vnd an allen chrieg han avf gegeben dem Gotshavs datz sand Florian ze einem ewigen selgeraet meiner sel mit allem dem reht vnd ich vnd mein vor vodern inne haben gehabt die selben aigenschaft. Daz dem vorgenanten Gotshavs datz sand florians hovs dehain chrieg noch ansprach avf ste noch werde von mir noch von dehainen meinen erben noch frevnden nach der vorgenanten aigenschaft datz Mavlspach an einem lehen, gib ich dem vorgeschriben Gotshavs disen prief mit meinem anhangvndem insigel ze einem ewigen v^erchvnde vnd ze einem sihtigem gezevg der vorgeschriben sache. Daz ist geschehen, do von Christes gepv^erde ergangen waren Tavsend iar, Drev hvndert iar, dar nach in dem nevntzehenten iar an vnser frowen tag ze der Lichtmisse in der Stat datz Stwyr.

Source Fulltext: OÖUB 5 (Wien 1868) S. 236, Nr. 241