ICH Margaretha vonn Capelle veriech vnnd Tue khundt allen den, die disen Brieff lesen vnnd hören lesenn, die noch Lebentig Sündt oder hernach khunfftig werdtenn, das Brueder Jacob vnnd Brueder Johannss zu den Zeitten Pfleger vnnser Styfftung zu Pulgarn des ordns des heiligen Geistes haben gegeben Pyllgrein dem müllner mit vnnser Gunst die müll zu windarn vnnd das Lechen dabey jnn dem Garttenn zu khauffrecht Recht vnnd Redlich, alss Khauffs Rechts Recht ist, jm vnnd allen Seinen khündernn vmb zechen Pfundt Pfening wienner münss also, das Sy von der müll diennen sollen zween muth Khorns, Einen halben muth an St. Michels Taag vnd ainen halben zu weinachten vnnd ainen halben zu Pfingsten vnnd von dem Lechenn darbey dreu schaff khornns vnnd zway habernn an Sannt michaelsstag vnnd Sechtzigckh Pfening, die zwaintzig Pfening zu weinachten vnnd Zwaintzig zw Ostern vnnd Zwaintzig zu Pfingsten . vnnd war aber, das das vorgenanndt Guett dev müll vnnd das lechen von jm vnnd von Seinen Erbenn oder wer es zu den zeitten jnnhatt, vnnbeylich halten wuerdt oder mit khainerlay Sach geeriget wuerdt, das die vorgenanndten herrenn vnnd vunser Styfftunge zw Pulgarn den vorgenanndten diennst von dem Guett nicht gehaabenn mechtenn, so sollen Sye Sich des guetts Recht vnnd Redlichen vnnderwündten also mit allem dem Recht, vnnd Sy es gehabt haaben, vnd allen den schaden, den Sy des Gutts Empfachenn oder Empfanngen haaben, den sollen Sy haben auf dem Guett vnnd auf allem dem zu Pullgarn der müllner hatt oder Seine Erbenn vnnd wer das Guett jnnehatt, die vorgenanndten herrnn vnnd all, die nach jnn khünfftig Sündt, darüber so gib ich margretha von Capelln disen Brieff zu ainem wahren getzeug vnnd ainem offen vhrkhundt diser Tatt versigelt mit meinem jnnsigel vnnd mit Brueder jacobs jnnsigll des ordens des heilligenn Geists zu den zeitten Pfleger zu Pulgarn . des bin Ich Getzeug hainrich der schweinbeckh, vllrich der schütz, herban Zeidell, Lüebhardt der Amman, Püllgrein der müllner vnnd annder Erbarrer leuth . der brieff Ist gegeben jnn dem hauss zu Steyreckh, da uon Cristus gebuerdt ist gewesen dreytzeehen hundert Jahre vnnd jnn dem Zwayntzigistenn Jahrenn ann St. Thamas tag.

Source Fulltext: OÖUB 5 (Wien 1868) S. 277-278, Nr. 287