Ich Fridreich der zwickchel vergich vnd tu°n chunt allen den, die disen brief sehent oder ho^ernt lesen, die nu lebent oder hernach chu^enftig sind, daz ich mit wol bedachtem mu°t vnd mit gu°tem rat vnd gunst aller meiner erben gegeben han dem Gotshaus datz sand Florian sunderleich durch got vnd durch meiner sel hail willen dreizzig phunt wienner mu^enzz auf meinem aigen, daz da leit auf der O^ede, daz ich gelediget han von allen meinen Erben vmb mein aigenhaft gu°t, dez ich gut v°rchu^ende han. Daz selb aigen han ich dem vorgenanten Gotshaus ledichleich auf gegeben für die egenanten phenning vnd wil auch des selben aigens dez egeschriben Gotshaus rechter gewer sein an aller stat fu^er alleu ansprach nach Landesrecht. Vnd swo dem vorgenanten Gotshaus an mier dez (icht) abget, daz schu^ellen si haben auf allem dem, vnd ich han in dem Lant datz O^esterreich. Wa^er aber gemant vnder allen meinen Erben, ez sey fraw oder man, die fu^erbaz immermer dhain ansprach wolden haben gegen dem egenanten Gotshaus vmb die egeschriben aigen, der schol dem selben Gotshaus die obgenanten dreizzig phunt phenning gaentzleich wider cheren an allen chrieg. daz die rede sta^et vnd vnuerchert beleib, dar vber gib ich disen brief versigelt mit meinem jnsigel vnd meins geswein jnsigel Otten dez Schachner vnd zu einer pezzern sicherhait mit meins herren jnsigel herren Hainreichs von Volkchenstorf, in dez Lantgericht daz egenant aigen leit zwischen der Ens vnd der Trawn. Diser sache sint gezeuge her Ott von Perchhaim, her Chunrat von Harthaim, Herwort der Chremstorffer, Fridreich von dem Stain, Hainreich der Hierttel vnd ander piderb lau^et genug. Der brief ist geben, do von Christes gepu^erde waren vergangen Dreutzehen hundert iar darnach in dem sechs vnd zwaintzkistem iar, an sand Go^ergen tag.

Source Fulltext: OÖUB 5 (Wien 1868) S. 450-451, Nr. 451