Ich fridreich zwikchel vergich vnd tv^en chvnt allen den, di disen prief sehent oder horent lesen, di nv sind oder her nach chvmftig werden, daz ich mit wol bedachtem muet vnd mit gveten willn vnd gvnst aller meiner Erben ze der zeit, do ich iz wol getv^en mocht, besvnderleichen meiner paider prveder Seifritzt vnd Vlreichs gegewen han dem erbern Gotzhaus hintz sand Florian dvrch got vnd dvrch meiner sel hail willen ein wis datz Lughaim, di da leit pei der prukk, der nicht gar ein tagwerch ist, di ich han gelo^est von den egenanten meinen Prv^edern ir tail vmb drev phvnt phenning ledichleichen vnd an allen chrieg. Wer awer iem vnder allen meinen Erben, iz sei vraw oder man, der dhainen chrieg oder dhain ansprach gegen der egenanten wis hawen wolt, der schol dem êgeschriben Gotzhavs gewen acht phvnt phenning wienner mv^enss an all wider red. Daz disev red stet vnd vnzeprochen beleib, dar vber gib ich disen prief verjnsigelt mit meinem jnsigel vnd zv einer pesser sichrichhait mit meins herren Hainreichs jnsigel von volchenstorf Diser prief ist gegewen, do von Christes gepvrt vergangen warden drevzehenhvndert jar, dar nach in dem sehss vnd zwanzigsten jar an sand vrbans tag.

Source Fulltext: OÖUB 5 (Wien 1868) S. 452, Nr. 453