Ich thomas von Lav vnd Elspet mein havsvrov vnd mein svn paid Chvnrad vnd Alber tuen chunt allen den, di disen prief lesent oder horent lesen, daz wier di nohsten erben zv dem hof ze O^etnvsch, der in der pharr leit ze Mechenhoven vnd viertzehen schilling wienner phenning geltz ist, den vnser prveder her Chvenrad von Lav pharrer datz sand Marein Chirhen nohen pei Everding geben hat im vnd seinn vodern ze einem selgraet dem Gotzhavs datz sand Florian, dar zv haben wier vnsern gveten wiln geben also beschaidenleich, daz der hern Siechmaister da selb den vorgenanten hof schol in seiner phleg haben, an tybvrzen tag schol er den hern ein halbs phvnt phenning geben vnd schvllen di vnsers prveder Chvnratz, der vorgenant ist, vnd seiner vordern jartag begen mit vigili vnd mit selmess; ein phvnt phenning schol er geben dvrch Got alle iar vnser tochter Eysaln, di weil di lebt vnd di weil si mit gaistleihem vnd chaevschem lebem Got dient, verchert si daz an ir vnd nimt an sich wertleich leben oder stirbt, so schol der vorgenant Siechmaister daz selb phvnt phenning alle iar dvrch Got geben vnser tochter Gerdravten ze Erlach Chloster, di weil di lebt, nach ir tod schol er daz selb phvnt phenning tailn vnder di armen Laevt in dem spital datz sand Florian; also hat avch vnser prveder her Chvnrad, der vorgenant ist, an seiner hantvest sein selgraet verschriben vnd bestsett mit seinem jnsigel vnd mit seiner vrevnt jnsigel, sechtzt phenning schol der siechmaister haben fuer sein mve, daz er den vorgenanten hof in seiner phleg hat vnd den verantwrten schol, Vnd dar vmb, daz vnsers prveder hern Chvnratz geschaeft vnd selgraet staet vnd an chrieg ewichleich beleib von meinn vnd meiner havsvrovn erben, gib ich disen prief dem vor genanten Gotzhavs bestaett mit mein thomass jnsigel von Lav. Der prief ist geben, dv von Christi gepverd vergangen warn drevtzehen hundert jar, dar nach in dem siben vnd zwaintzkistem iar an sand Florians tag.

Source Fulltext: OÖUB 5 (Wien 1868) S. 477-478, Nr. 480