Ich Ortolf waltpoten genant Purger ze Enss vergich vnd tv°n chvnt an disem prief allen den, di in sehent oder horent lesen, daz vns her wernher der Ersam herre Probst vnd avch di sammvng datz sand florianshavs habent verlihen mier vnd meiner havsvrawen vro Gerdravten vnd avch allen meinen erben di Mvl datz Lanczenperg vnd ain Lehen datz dem Po^elan vnd ainn akcher in der Tenne zv einem ewigen zins also, daz wir da von dienen alle jar schullen an vnser vrawen tag ze der dienstzeit dem Guster datz sand florianshavs von den vorgenanten gueten, Mul vnd avch lehen funfzehen phenning newer wienner. Saumpt awer wir daz indert ich oder mein erben, so vervellt sich wandel dar auf, als auf anderm irem zins guet, daz ist ze drin virzehen tagen sehts schilling phenning, da mit gestvnd iz danne ain jar, wer awer daz, daz ich oder mein erben in jars vrist dez nicht abchemen vmb den zins vnd vmb di wandel, so schulle wir geuallen sein von allem vnserm recht vnd schullen di vorgenanten guet dem Gotshaus datz sand florian ledigk sein an allen chrieg, vnd daz di sache vnd di wandlvng stet vnd vnzebrochen furbas beleib, dar vber gib ich ze einem vrchvnd dem vorgenanten Gotshaus datz sand florian disem prief bestetigt mit meinem jnsigel vnd ze ainem zevg ynd pezzer bestetigvng mit hern Hainreichs jnsigel von volchenstorf vnd mit den zevgen, di hie geschriben sind, her Marchart der Po^enhalm, vlreich von hvsendorf, Marchart Chersperger, Chvnrat grevzincher, Dietmar wolfstain, hainrich hyrtel, hainreich Chalberger, Seifrid hvgenperger, vlreich Schich, hainreich Schich, Ekhart Schich, Chylian Schich vnd ander erber leut genveg. Dis wandlvng ist geschehen datz sand florian, do von Christes gebu^erd ergangen waren drevzehenhvndert jar, dar nach in dem siben vnd zwanzigsten jar an sand Nyclas tag.

Source Fulltext: OÖUB 5 (Wien 1868) S. 501-502, Nr. 503