ICH Rapoldt vonn Valckhennperg Vnnd ich Anngness Sein hausfrau wier veriechen vnnd thuen khundt allen den, die disen brieff lesent oder hören lesen, die noch lebent vnnd hernach khunfftig Sündt, dass wier mit aller vnnser erben guetten willen vnnd gunst, mit wolbedachtem muett vnnd mit gesambter hanndt vnnd nach vnser freundt Ratt zu der Zeitt, da wier es woll gethuen mechten, gegeben habenn vnnserer lieben muemben frauen angnesen herrnn hadtmayrs Tochter von valckhenberg, dem Gott genadt, vnnsers Rechten aygens viertzigckh Pfundt wienner Pfening geltes mit allem dem nutz vnnd Recht, alss wier Sy gehabt habenn vnnd alss Sy vnnser vordern von alter herbracht habenn, es Sey zu holtz, zu velte oder zu dorffe, gestyfft oder vnngestyfft, versuecht oder vnuersuecht, wie so das genanndt ist, auf dem vrbar, das hernach geschriben Stett. des ersten das Khlaubendorf Achtzechen Pfundt gelts vnnd zwenundtSechtzig Pfening gelts, das wissleinsfelte dreu Pfundt geltes vnnd Sechs vnnd dreyssig Pfening geltes, das dem Sitzmanns acht Pfundt vnd ainen vnnd drey schilling Pfening geltes vnnd ainen weingartten, der da haisset der Täussel, füer fünf Pfundt geltes vnnd zwenn weingärtten, ainen jnn der gegenbeundt, der annder in dem jochenthall füer vier Pfundt geltes ann Achtzig Pfening vnnd ain holtz das ||
||
Khlaubendorff füer Achtzig Pfening gelts vnnd auf dem Paungartten, den ockh (ott?) der vischer zu hädreinstorff hat jnnen gehabt, ain Pfundt gelts, jeres Rechten erbthaills vnd das jer anngefallen Ist von jerem vattern dem vorgenanten herrn hadtmayrn von Valckenberg darumb, das Sy Sich füertzicht hat gethann vnnd fürbass auf das annder Erbe khain ansprach nit haben soll vnnd das die vorgenant frau Anngnes gebenn hatt durch gott mit vnnser gunst vnnd mit willen vnnd gunst vnsers lieben Oheim herrnn Joannsen von Capelln vnnd vnnserer liebenn muemben frauen Alhaitn herrnn Eberharts Hausfrauen von walsee vnnd aller vnnser Erbenn dem Gottshauss zu Pulgarn vnnd dem ordtenn des hailligen geistes denn frauen desselben Ordenns mit allem dem nutz vnnd Recht jnnezehaben ebigclich alss annder guett, das der Erbare herr herr vlrich von Capelln dem gott genadte, der erst Styffter vnd sein sohnn herr hannss von Capelln vnnser Oheim mit aller vogthey vnnd mit aller freyunge dargebenn habent dennen Priestern desselbenn Ordens vnnd dreytzechen Süechen, die Sy vor gestyfft habenn, vnd auch geben haben dem vorgenanndten gottshauss zu Pulgarn, wier veriechen auch mehr ich Rapoldt von valckhenberg vnnd ich Anngness Seynn eheliche hausfrau mitsambt allen vnnsern erben, ob jemandt die vorgenandten guett wolt ansprechen, dess Sein wier vnnserer muemben frauen Angnesen von valckhenberg vnd des gotshauss zu Pulgarn orden des heilligen Geists Recht gwer füer all ansprach nach des Landes Recht zu Österreich, vnnd dass dise Redte vnnd die wandlunge zwischen vnnss vnnd vnnser muemben frauen Angnesen von valckhenberg vnnd des gotshauss zw Pulgarn ordten des heilligen Geists Stätt vnnd ebigclichen vnnzerbrochen bleibe, darüber so geben wier jnnen disen brieff zu ainem Offnen vhrkhundt vnnd zu ainem wahren getzeuge vnnd zu ainer ebigen vestung diser Sach versigilt mit vnnsern Innsigelln vnnd mit der erbaren herrn jnnsigeln die hernach geschriben Stehnn, herrnn Albrechts von Khunringen, herrn Rudolfs von Podendorff, herrnn hannsen von Capellen, herrnn Eberharts von wallsee landt Richter ob der Ennss, herrn Jannsen von khunringenn, herrnn Eberharts von wallsee herrnn fridreichs Sohnn von wallsee, dem gott genadt, die alle diser Sach Getzeugen Sündt mit jerenn jnnsiglln. diser brieff Ist gegebenn, da von Christus gebuerdt warnn ergangen dreyzechen hundert Jahr, darnach jnn dem acht vnnd zwainzigistenn Jahr an vnnser frauen verkhündigung tag.

Source Fulltext: OÖUB 5 (Wien 1868) S. 506-507, Nr. 509