Ich Peter der Tawer Purger ze Lintz vnd mein Housfrow Katrey vnd alle vnser Erben Wier veriehen vnd tu°n chunt allen den, di disen brief sehend oder horent lesen, lemtigen vnd chunftigen, Daz wir mit wolbedachtem mut vnd mit gutleichem willen vnd gunst aller vnser Erben vnd mit gerichtz hant redleich vnd recht ze chouffen haben gegeben dem Ersamen herren Probst Hainrich datz sand Florian vnd seiner saligen Sammung zwai phunt phenning alter winner rechtz Purchrecht geltz, di wir gehabt haben auf dem Hous, daz weilen waz meines Swehers Hainrichs an dem Vruar ze Lintz und daz ze dirr zeit Judleins des Juden ist, vm ein gelt, des wir gar vnd gaentzleich gewert sein. Vnd man geit in dasselbe Purchrecht zv dem selben Gotzhaus ewichleich von dem selben Hous alle Jar ze Weinachten mit ein ander, also vnd Purchrechtz recht ist nach der stat ze Lintz. Vnd wir schullen auch desselben Purchrechtz ir gewer sein fu^er alle ansprach also vnd der stat recht ist ze Lintz auf Purchrecht, oder naemen sev dar vber chainen schaden, den schull wir in ab legen, vnd schullen daz haben auf vns vnd auf alle dev vnd wir haben besucht vnd vnbesucht. Daz di red staet vnd vnzebrochen beleib, dar vber geben wir disen brif gesigelten mit der stat Insigel ze Lintz. Der brif ist gegeben, do man zalt Nach Christes geburd Dreutzehen Hundert Jar, dar nach in dem sechs vnd dreizikisten Jar an sand Jacobs Tag.

Source Fulltext: OÖUB 6 (Wien 1972) S. 209f., Nr. 206