Ich Janss von Traun vnd ich Ofmey sein Mu^eter vnd ich Elspet sein Hausfrow vnd alle vnser Erben — Wir veriehen offenbar vnd tu^en chunt allen den, die disen brief sehent oder horent lesen, lemtigen vnd chunftigen, Daz wir mit wolbedachtem mut vnd mit gu^etleichem willen vnd nach vnser besten vrevnt rat vnd mit gesampter hant recht vnd redleich ze chauffen haben gegeben dem Erbern Ritter hern Hainreichen dem Chaiser vnd allen seinen Erben Svnn vnd Dochtern, di er hat oder noch gewint, vnser manschaft vnd di aygenschaft mit allen nutzen, als sei vnser vorvodern vnd wir in nutz vnd in gewer gehabt haben, vber di gu^et, di sev vor von vns ze rechtem lehen gehabt habent, Den Hof ze Pu^ech, di Hu^eb ze Nuspach vnd zwai gut ze Erlach in der pfarr ze Nezzelpach vnd daz gu^et an der wiz, ze naegst bei Aisental mit allen nutzen vnd mit alle dev vnd da zv gehort ze holz vnd ze veld, besu^echt vnd vnbesu^echt, der wir vns gar vnd gaenzleich mit sampt der Manschaft vnd aygenschaft ewichleich fürzicht tun, vm ein gelt, des wir gar gewert sein. Vnd wir vnd vnser Erben schullen derselben Manschaft vnd aygenschaft vnd der vor genanten gu^et ir vnd aller ir Erben svn vnd Tochter scherm vnd gewer sein fu^er alle ansprach also Landes recht ist. Oder naemen sev oder ir Erben dar vber chainn schaden, den schullen wir vnd vnser Erben in vnd iern Erben ablegen Vnd schullen daz vnuerschaidenlich haben auf vns vnd auf vnsern trewen vnd auf alle dev vnd wir haben in dem Lant ze Osterreich vnd ob der Ens, versu^echt vnd vnuersu^echt. Daz di red staet vnd vnzebrochcn beleib, Dar vber geben wir den brief zv einem warn vrchund dirr sach gesigelten. Ich Jans von Travn vnd ich Ofmey sein Mu^eter mit vnsern anhangunden jnsigeln vnd zv einer gezeugnuss mit meins Ohaims hern Dietreichs jnsigel von Weizzenberch vnd mit seines svns hern Dietreichs jnsigel, vnd der sach sein gezevg alle die, di den brief sehen oder horen. Der brief ist gegeben Nach Christes gebu^erd Dreutzehen Hundert jar, dar nach in dem siben vnd dreizikisten Jar, des Mitichens nach mitteruasten.

Source Fulltext: OÖUB 6 (Wien 1972) S. 232f., Nr. 229