Ich Chvnrat der Marderstorfer von Spitz vnd mein Hausfraw Mergart vnd alle mein Erben vergich an disem brief offenbar allen Lewten, Daz ich nach rat der vmbsetzen vnd mit guetem willen des perchmaisters, fridreichs des forster ze sand michel, der da selben Stifter vnd storer ist, an meines herren stat des Byscholfs von Pazzaw Han verchawft ain Ewigs Halb phunt Gelts wienner phenning auf ainem weingarten, der da leit ob sand Mychel pay der Mvl vnd stozzt an di Gazzen, vnd daz selb halb phunt gelts schol ich oder mein Erben oder swer den weingarten fu^erbaz inne hat, Ewichleichen raichen swer zehmaister ist des Gotshavs ze sand Mychel alle Jar an sand Cholmanstag in rechter purchrechts gewer vnd alle di wandel, di auf purchrecht gehorent gent dar auf, wanne si vesezzen (sic) werdent, vnd verviell sich im auch nach purchrechts recht. Daz im daz staet vnd vnzebrochen beleib, dar vber gib ich vorgenanter Chunrat disen brief versigelten mit vnsers Genadigen Herren Insigel hern Jansen von Chunring ze Einem warn gezevg vnd vrchvnd diser sach. Der Brief ist geben nach Christi gebvrd vber Drevzehen Hundert Jar, Darnach in dem acht vnd dreizzigisten Jar an vnser vrawn Tag ze der Liechtmisse.

Source Fulltext: OÖUB 6 (Wien 1972) S. 261f., Nr. 257