Ich Johans von Chunring, Schench in Osterreich, offen an disem brief, daz ich mich endelich an den ersamen Herren dem Brobst von sant fiorian vnd an hern vlrichen dem Pfarrer ze sant Michel vnd an andern Herren des selben Gotshous eruarn han, di mit ir triwen vnd pei ir gewizzen mir gesagt habent, daz her weichart der Pfarrer nv datz Swans gewesn ist, ze der zeit, do er ez wol getu°n moht, ê er ie aigen Chirchen gewune in sein pfenning in ir gwalt antwurtt, daz si einen weingarten chouffen solten der pei dem Gotshous ewichlich belib im ze einem Selgereth vnd chouften ouch einen weingarten haizt der Opênl vmb di selben pfenning im ze selgereth also, daz man seinen Jartach da von ewichlich da von begen sol mit Misse, mit vigili, als andern ir Pruedern vnd swer Probst ist, der geit der Samnung des tages zway pfunt pfenning, di man vnder si tailt vnd hat daruber ir offen prief gehabt. Si habent ouch den selben weingarten pei hern weicharts zeiten von meinem Perchmaister enpfangen vnd in rechter gewer her praht, da von bechenne ich ir reht vnd pin ouch des selben weingarten ir scherm fur gwalt vnd fur vnreht, swo si des bedurfen.

Source Fulltext: OÖUB 6 (Wien 1972) S. 366, Nr. 361