Ich Sighart der Piber vnd mein Hausfrow vrow Ann vnd alle vnser erben Wier veriehen offenbar vnd tu^en chunt allen den, die den brief sehent oder lesen horent, Daz wier mit wolbedachtem mu^et vnd mit gu^etleichem willen recht vnd redleich ze chaufFen haben gegeben den erbern Gaeistleichen herren vnd vrown vnd iern gotzhaus ze Pulgarn vnser Drittail, daz wier gehabt haben an der Hu^eb ze Noern, di da haist di Hurbmr. mit allem dem nutzen, vnd zv^e dem selben Drittail gehört ze Holtz vnd ze veld, versu^echt vnd vnuersu^echt, vm Dreutzehen phunt phenning wienner Munss, der wier gar vnd gaentzieich gewert sein. Vnd wier sein ouch dez vorgenanten drittails auf derselben êgenanten Hu^eb ier vnd des vorgenanten Gotzhauss gewer, also Lantz recht ist, Vnd naemen sev oder daz vorgenant Gotzhaus darvber chainn schaden der gewerschaft fu^er alle ansprach, den schullen wier in ablegen vnd schullen daz haben auf vns vnd auf vnsern trewn vnd auf alle dev, vnd wier haben versu^echt vnd vnuersu^echt. Daz di red staet vnd vnzebrochen beleib, darvber geben wier den brief gesigelten Ich Sighart der Piber mit meinem anhangunden Jnsigel. Der brief ist gegeben Nach Christes gebu^erd vber Dreutzehen Hundert jar, darnach in dem viertzkisten jar an sand Andres abent.

Source Fulltext: OÖUB 6 (Wien 1972) S. 358, Nr. 353