Ich Janns von Chappell vnd ich Chunigunt sein Hausfraw Wir veriehen vnd, tu^en chunt offenbar mit dem brief allen den, die in sehent oder ho^ernt lesen, daz wir mit aller vnserr erben guten willen vnd gunst ze der Zeit do wir ez wol getu^en machten, durch Got vnd mit gu^eter andacht haben geben zu der Chapellen datz sand Lienhard, die ein zu^echirich ist hintz der Pharr datz gu^ettaw, allen chlainen zehent, den wir haben in derselben pharr, wie der genant ist, mit allem recht rnd nutzz, als wir in haben inn gehabtt vnd von alter in vnser gewalt cho^emen ist, vnd ein haus daz gelegen ist in demselben dorff datz sand Lienhart, vnd einen chrautgarten do selben vnd ein wis, der ist anderthalb tagwerich auch in derselben pharr, ze trost vnd ze einem ewigen selgera^et vns vnd allen vnsern vodern also beschaidenleich, daz ein priester da sitzzen schol ewichleich vnd dieselben chappellen besunderlich besingen, wann manich mensch doselben vervaren ist an gotes leichnam von der verr, deu ist von der Pharr ze Gu^ettaw hintz sand Lienharten vnd noch geschehen mocht, ob wier ez nicht vndertsu^enden. Ez schol auch der selb priester in nemen vnd behalten alles, daz zu derselben chirchen ze recht geho^ert, ez sey von Opher oder von weu ez iem werden mag oder von chlainem zehent, als vor geschrieben stet, an grossen zehent alain paiderlay traid, den wier ru^egen ze halten vnd offenleich auznemen vnd schol davon raichen alle iar einen zeitleichen zins dem Pharrer hintz Gu^ettaw, als ez begert vnd anders nicht (sic). Wa^er aber, daz ein priester da sa^ezz, der eins vngeornten lebens wa^er, dez nicht sein schol vnd an der herren zehent von sand Florians haus saumig wa^er, als vor ist oft geschehen, vnd darvber drei stund gemont wv^erd vnd sich nicht pezzern wolt, so schol der pharrer datz Guttaw haben vollen gewalt den selben priester vercheren vnd einen andern, der pezzer sey, an sein stat setzzen vnd der iem den zins als vor geschriben ist, zu einem zaihen, daz er iem vndertan schol sein, geb alle iar als sich die zeit schikche. daz die sache vnd die wandlung sta^et vnd vnzebrochen beleib, Darvber gib ich vorgenanter Jans von Chappell disen brief zu einem waren v^erchu^end versigilten mit meinem Insigel, der geben ist ze Mitterberch Nach Christi gepu^erd Tausent iar, dreihundert iar darnach in dem zwai vnd viertzkistem iar an sand Johannstag ze Sunibenten.

Source Fulltext: OÖUB 6 (Wien 1972) S. 415f., Nr. 412