"Ich, Chalhoch von Valchenstain(1), vnd mein vetern Friderich(2) vnd Chunrat(3), wir veriehen vnd tuen chunt alle den, so disen brief sehent vnd lesen horent, daz Ott von Chlafpach(4) vnd sein svn Ottel(5) den zehent, datz Gvnthers revt(6), di zwai tail, di si von vns ze rehtem lehen habent, mit vnserr hant vnd mit vnserm gueten willen, habent versetzt dem gotshavs vnd den prudern datz dem Slag(8), vmb zwaimen dreizich pfunt Pazzawer pfening(9), der si sev reht vnd redleich gewert habent, also beschaidenleichen daz si den nutz, di weil si niht lesen, vnser vrown ze pezzrung anlegen, vnd daz daz baidenthalb stet beleib. Dor vber geben wir in disen brief ze einem vrchvnd, versigelt mit vnserr dreir jnsigel. Der brief ist geben datz dem Slag, do von Christs burd worn drevtzehen hvndert jar, in dem ersten jar, an sand Pauls bechervng. Des sint zevg: her Rudolf von Valchenstain(10), chorherr ze Pazzaw, der Levpold von Morspach(11) vnd Herbort(12) sein son, Jrenfrid der Chlafpech(13), der junge Povntter(14), Symon(15), Ditriech der schreiber(16), Ditrich der chelner(17), Nycla der prior(18), her Friderich(19), her Chunrat(20), bruder von dem Slag, vnd Chunrat der amman(21), vnd ander piderb levt."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 44 (S 32), S. 62-63