Schuldbrief:||
"Ich, Wernher von Winchel(1), hern Eberharts von Walsse(2) schriber, vergich vnd tun chunt an disem brief, daz ich den ersamen herren, brobst Vlrichen(3) vnd der samnunge des gotshous ze dem Slag(4), geben sol silber, swaz fur aht vnd sibentzik pfunt nivver pfenninge, an sand Marteins tach(9) geuellet, der nu schirist chumt, der ich von der Cholmans witiben von Stain(10) von ir wegen, gewert sol werden, vnd swaz danne, nach gemainem gange, des silbers wirt, nach rehter raittunge, daz sol ich im gelten, vor sand Georm tag(7), der darnach schierist chumt, vnd verrihten ze Lintz(6), vnd hat mitsampt mir, vnd zv mir darumb gelobt, mein herre, her Eberhart von Walsse, daz im daz gelaistet sol werden, an allen ouf schub. Geschech des niht, des Got niht geb, so sol ich, Wernher der vorgenant, vnd Chunrat Magenhousen(11), ze Lintz, in eins erberen wirtes hous, ouf meinen schaden in varen, vnd nimmer ouz chomen, vntz ich di vorgenanten herren, des vorgenanten silbers, daz sich zwht(b) vmb aht vnd sibentzik pfunt als vor beschaiden ist gentzlich gewert hab. Daz ditz gelubt von mir stet vnd vnuerchert beleib, daruber gib ich in, den vorgenanten brobst Vlrichen vnd der samnunge disen brief ze vrchunde, bestetigt mit meins vorgenanten herren, hern Eberhartes von Walsse jnsigil vnd ouch mit meinem jnsigil. Der brief ist gegebn an dem Antlaz tag(8), nach Christes geburtte vber drivtzehn hundert iar, darnach in dem nivnten Jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 80 (S 64), S. 95-97