"Wier, Ruodolff(1) der vierd, von Gotes gnaden erczherczog ze Oestereich, ze Steyr vnd ze Kernden, herr ze Chrain, auf der Marich vnd ze Portenaw, graf ze Habspurch, ze Phirt vnd ze Kyburch, marichgraf ze Purgow vnd lantgraf in Elsazz. Veriehen offenlich mit disem brief fuer vns, vnser brueder vnd erben, daz wier zue nucz vnd frvm vnser land, vnd ouch durch fleizziger bet willen des erbern vnd geistleichen probst Jansen(2) von dem Slegel(3), des ordens von Premonstrat in Pazzower bistum, vnsers lieben andechtigen kapplan(4), erlaubt haben vnd erlouben ouch wizzentlich mit disem brief, daz fuerbas ewichlich daselbs auf dem Aygen(5) in dem dorff alle wochen an dem samcztag offner vnd freyr markt(6) sey an allen dingen, die man da hin ze markt bringet, wie di genant vnd gehaizzen sein, der wart, daz sich die erbern vnd geistleichen leut, der probst vnd der conuent desselben klosters, darczue das obgenant dorff gehoert, desterpas betragen vnd ier notdurfft da gehaben mugen, wan si vns, vnsern vordern vnd nachkomen einen ewigen jartag(7) darvmb legen sullen, als wier des ier brief vnd vrchund haben. Dauon gebieten wier allen vnsern houptleuten vnd amptleuten, gegenwurtigen vnd kvnftigen, daz si die egenanten klosterleut von dem Slegel an dem obgenanten wochenmarkt nicht irren, svnder daz si si dabey beleiben lazzen, mit allen rechten, freyhaiten vnd gueten gewonhaiten, als ander wochenmerkt in vnserm lande von alter sind herchomen. Diser sache sind geczeugen die ersamen, vnser lieben andechtigen Albrecht tuomprobst ze Pazzow(11), abt Hainrich von Engelcell(12), die edeln, graf Ott(13) vnd graf Ruodolff(14) von Ortenburch, gebrueder, graf Vlrich(15) vnd graf Hainrich(16) von Schowmberch ouch gebrueder, vnser lieb oehem, vnser lieb getrewn Eberhart von Walsse(17) von Lincz, Eberhart von Chappel(18), Jans von Trawn(19), houptman ob der Ens, Ott von Stubenberch(20), Puorchart von Ehrbach(21) der elter, Ott von Zelking von Schoennekk(22), Dyetmar von Losenstain(23), Hainrich von Rappach(24), vnser hofmaister, vnd ander erber leut genueg. Des geben wier ze verchund disen brief besigelt mit vnserm grozzen fuerstlichen anhangundem jnsigel. Der geben ist ze Pazzowe an pfincztag nach sand Jacobs tag, des heiligen zwelfbotten, nach Kristes gepuerd dreuczehen hundert iar, darnach in dem zwai vnd sechczigistem iare, vnsers alters in dem drey vnd zwainczigisten, vnd vnsers gewaltes in dem fumften jare." ||
||
[Eigenhändige Unterschrift:] "+ Wir der vorgenant herzog Ruodolf sterken disen prief mit dirr vnderschrift vnser selben hant +"

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 168 (S 127), S. 171-174