"Ich Nicla(1) priester zu den zeiten gesell ze Altenvelden(2), Artolfs pechken des Muerringer(3) svn, purger ze Haslech(4) seligen, vergich vnd bechen offenleich mit dem brief allen den, di in sehent, hoerent oder lesent. Daz ich mit wol bedachtem muet vnd mit rat meiner pesten freunt zu der zeit, do ich ez wol getuen mocht, mier vnd allen meinen vorvordern ein ewigs selgret gemacht vnd gestift han, eim yedleichem pharrer zu einer ewigen widem(5) auf dem halben haus vnd purchrecht, daz mein freis purchrecht gewesen ist, vnd daz ich vmb mein aygen hab, di ich mit meinen diesten verdient han, gechauft han, vnd daz gelegen ist ze Haslech auzzerhalben dez marchcz, oberthalben der pastuben(6), zu der rechten hant pei dem gatern, mit allen den eren, rechten vnd nuczen, vnd dar zu gehorent, besuecht vnd vnbesuecht, mit solher beschaiden, daz ein ieczleicher pharrer dacz sant Oswald(7) mier vnd meinen vorvordern begen schol ze Haslech in dem marcht zu einer ewigen gedechtnuzz, vier stunt in dem iar, zu yeder chottemmer(8) an der svntag nacht mit einer gesvngen vigili vnd dar nach vmb di chirichen zegen mit dem weichprun, all gelaubigen selen zehilf, vnd an dem mantag morgen dar nach vmb di chirichen zegen mit dem veichprun, vnd an dem selben mantag morgen schol man ein selampt singen zu der mezz, di man sust von recht do haben schol. Vnd [...](9) gedenchen auf dem letter(10). Vnd daz vorgenant halb haus vnd purchrecht schol ein pharrer da selbs ewichleichen inn haben [...] raichen vnd geben schol daz gelt, daz her nach gesriben stet, des ersten dem pharrer von ieder vigili sechczehen [...] di chost zu ieder chottemmer acht pfenning, dar nach dem gesellen von ieder vigili acht pfenning vnd zwelif [...] selbst, daz er der sel gedenchen schol auf dem letter all svntag dem schuelmaister(11) oder einem schueler vier [...] so singen, dem mesner drei pfenning, dem gocshaus vier pfenning von zwen stekcherczen, di prinnen schull[en...] dem selampt. Wer aber daz, daz man di vigili an der vorgenanten svntag nacht vnd dar nach di gel[esen mess...] nicht begieng, ez wer von veiertag oder von leich wegen, so schol ez der pharrer in der selben wochen begen [...] ez alweg begangen werd vnverzogenleich in der selben wochen. Wer aber daz, daz ein pharrer dar inn savmig wer vnd [...] vnd di stift nicht begieng, als vor gesriben stet, so schol er zv einer pen vnd pessrung geben vnd raichen zway [...] wachs in daz zechschrein ze Haslech, als oft vnd er daz versavmt. Wolt aber der pharrer zv dem andern mal daz versavmen, [so] hat der zechmaister vnd die purger da selbst wollen [!] gewalt, des vorgenanten halben haus vnd purchrecz vnd aller der nucz vnd da von bechoemment ze haus vnd zu veld sich zu vnderwinden vnd dem goczhaus inn ze haben vnd da von zebegen alles das, daz e geschriben ist vncz als lang, daz sich der pharrer let vnderweisen, daz er daz vorgenant selgret fuedert vnd nicht yert. Vnd alle di, di daz selb selgret fuedernt vnd dar zu geholfen sein, daz ez volpracht wiert, di habent ganczen vnd vollen tail mit de [..] i ez gestift habent. Vnd daz di red vnd wandlvng stet vnd vnzeprochen beleib, dar vber gib ich, vorgenanter Nicla den brief zu einem waren vrchvnt, besigelten mit des vorgenanten marchcz ze Haslech vnd mit des erwierdigen hern, hern Stepfan(12), zu den zeiten techent vnd pharrer ze Gallneuchirichen, vnd mit des hern Hansen(13), zu den zeiten pharrer ze Altenvelden, anhangunden jnsigel, di si durich meiner fleizzigen pet willen an gehangen habent, zu einer pessern sicherhait der obgeschriben sach, wan ich selb aigens jnsigel nicht han. Der brief ist geben, do man zalt von Christi gepuerd drevcehen hundert [iar, dar] nach in dem drev vnd sibiczegisten iar, an sand Joerigen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 184 (S 132.a), S. 185-186