"Wjr, graf Hainreich zw Schawnberch(1), veriehen vnd tuen chunt fuer vns vnd alle vnser erben offenleich mit dem brieff allen den, di in sehent, hoerent oder lesent, daz fuer vns chomen sind die erbern geistleichen, der probst vnd der conuent dez gotzhaus dez ze dem Slegel(2), vnd habent vns ermanet mit vrchunden vnd briefen der genaden vnd freyung, die in von vnsern vordern ze Aschach(3) auf vnser mautt gegeben sind, vmb sunder bedaechtnuezz vnd jartaeg, die si fuer vnser vordern vnd ir nachkomen sel vnd hail jaerleich in irm gotzhaus begen vnd haben sullen. Nu mainen wir, die genad vnd selgeraet, die vnser vordern dem vorgenanten gotzhaws geben haben, nicht ab ze nemen, sunder wir wellen vnsrer vordern, vnser vnd vnsrer erben sel hail, alz billeich ist, meren vnd bedenkchen, vnd haben dem egenanten, dem probst vnd conuent ze dem Slegel vnd iren nachkomen ir genad vnd freyung fuer vns vnd vnser erben bestaett vnd vernewet, mit der beschaiden, waz man in traid oder wein her auf zu irm gotzhaus fueret, daz si von iegleicher scheffart nicht mer denn zwelif pfenig ze recht vnd nicht mer ze mautt, noch fuer all sach geben sullen, angeuaerd also, daz si vnser vnd vnsers geslaechtez jarleich bedaechtnuezz haben am montag nach mitter vasten mit vigili vnd selmezzen, alz ob wir selb vnser begrebnuezz in irem gotzhaus hieten. Waer aber, daz si di selben gedaechtnuezz nicht begiengen, alz vor beschaiden ist, so habent si die egenanten freyung mit der sawmung verworicht, vnd stet an vnsern genaden, waz wir in darnach an der egenanten freyung lazzen. Vnd dez zu vrchund geben wir in den brief, versigelten mit vnserm grozzem anhangundem jnsigel, der geben ist zw Schawnberch am pfintztag nach sand Andreas tag, do man zalt von Kristi geburd dreutzehen hundert jar, vnd in dem siben vnd sibentzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 192 (S 136), S. 192-193