"Jch, Haeeschel(1) der jud von Herczogenwerch mayster Jsrahels(2) sun von Chrems vnd all mein eriben, wier vergechen offenleych mit dem prief allen den, dew jn sechent oder hoerent lesen, vber den weingarten, genant dy Pewnt, gelegen zu Puchel(3) ze nagst Petreins dez Schreiber(4) pewnt, da von man jaerleych dient zu purkchrecht funfzechen Wienner phenning jn dez abcz hof von Pawern ze Jewching(5) an sand Michels tag vnd nicht mer, der vns gestanden jst von Fridreychen dem Truebinbein(6) ze Wachaw vnd von allen sein eriben. Den selben obgenanten weingarten sagen wier jn, oder wer jn von jn chauft, ledig vnd loez, gancz vnd gar, pey vnsern trewn, an gefaer, vnd mugen den fuerbaz wol verseczen vnd geben, wem sew wellen an all vnser ierrung. Dez zu verchund geben wier jn den offen prief, versigelten mit der erbern Hansen dez Polcz(7), di czeyt dez racz vnd judenrichter zu Chrems, vnd Chuenracz dez Flanders(8) zu Wesendarf, di payd der sach an vnser stat durich vnser fleizzigen pet willen zewg sind mit iern aygen anhangunden jnsigel, jn payden an schaden. Der prief ist geben nach Christi gepurd drew czehen hundert jar, dar nach jn dem siben vnd achchzikistn jar, dez phincztags far sand Stephans tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 207 (S 146), S. 209