"Bonifacius(1) episcopus, seruus seruorum Dei, dilecto filio abbati monasterij Brewnowensis(2) prope Pragam salutem et apostolicam benedictionem. Dignum ||
arbitramur et congruum, ut illis se reddat sedes apostolica gratiosam, quibus ad id propria uirtutum merita laudabiliter suffragantur. Exhibita siquidem nobis nuper pro parte dilecti filij Prcziechonis(3) de Prcziedborczicz, canonici monasterij Milocensis, Premonstratensis ordinis, Pragensis diocesis, peticio continebat, quod olim parrochiali ecclesia in Kirslag, alias in Swietlik(4), dicte diocesis, que per canonicos dicti monasterij regi consuevit, et quam quondam Bartholomeus(5) ultimus ipsius ecclesie rector dum uiueret obtinebat, per ipsius Bartholomei obitum, qui extra Romanam curiam decessit, uacante, dilectus filius Dyepoldus(6), prepositus monasterij Plagensis per prepositum soliti gubernari, dicti ordinis, Pathauiensis diocesis, cum ad prepositum eiusdem monasterij Plagensis pro tempore existentem presentacio rectoris dicte ecclesie, cum uacat pro tempore, de antiqua et approbata ac hactenus pacifice obseruata consuetudine pertineat, dictum Prcziechonem ad eandem ecclesiam sic uacantem dilecto filio Johanni de Kbel(7), canonico Pragensi, tunc administratori in spiritualibus ecclesie Pragensis, per dilectos filios, capitulum ecclesie dicte Pragensis tunc pastore carentis specialiter deputato, infra tempus legitimum(a) presentavit, dictusque canonicus, tunc administrator, eundem Prcziechonem auctoritate ordinaria in rectorem parrochialis ecclesie instituit antedicte, ac idem Prcziecho uigore presentacionis et institucionis huiusmodi eandem parrochialem ecclesiam extitit assecutus. Cum autem, sicut eadem peticio subiungebat, idem Prziecho dubitet presentacionem et institucionem huiusmodi ex certis causis uiribus non subsistere et sicut accepimus dicta parrochialis ecclesia adhuc, ut prefertur, uacare noscatur. Nos uolentes dictum Prcziechonem apud nos de religionis zelo, uite ac morum honestate alijsque probitatis et virtutum meritis multipliciter commendatum, horum intuitu fauore prosequi gracioso, discrecioni tue per apostolica scripta mandamus, quatenus, si per diligentem examinacionem eundem Prziechonem bene legere, bene construere et bene cantare ac congrue loqui latinis uerbis et alias ad obtinendam dictam parrochialem ecclesiam ydoneum esse repereris, uel eciam, si idem Prziecho non bene cantaret, dummodo in tuis manibus iuret ad sancta Dei euangelia, quod infra annum a tempore examinacionis huiusmodi computandi bene cantare addiscet, super quibus tuam oneramus conscienciam, ecclesiam parrochialem predictam, cuius fructus, redditus et prouentus duodecim marcharum argenti puri secundum communem extimacionem ualorem annuum, ut ipse Prziecho asserit, non excedunt, siue ut premittitur siue alias quouismodo aut ex alterius cuiuscumque persona seu per assecucionem alterius beneficij ecclesiastici apostolica auctoritate collati uel per liberam resignacionem alicuius per eum de illa in dicta curia uel eam extra eciam coram notario publico et testibus sponte facta uacet eciamsi ipsa parrochialis ecclesia ex eo generaliter quidem aliquis eam obtinens illam in aliquem euentum ex uoluntate dicte sedis demittere tenebatur, uel alias disposicioni apostolice specialiter reseruata existant et super ea inter aliquos lis, cuius statum presentibus haberi uolumus pro expresso in dicta curia uel extra eam, pendeat seu remanserit indecisa. Et is, ex cuius persona ultimo uacauit sedis predicte cappitaneus seu nuncius uel alius officialis aut fructuum et prouentuum camere apostolice debitorum collector uel subcollector seu eiusdem camere clericus aut causarum pallacij apostolici auditor uel litterarum apostolicarum concionator, scriptor uel abbreuiator seu sedis eiusdem uel alicuius ex venerabilibus fratribus nostris sancte Romane ecclesie cardinalibus fuerit, eidem Prziechoni, dummodo ipse in dicta parrochiali ecclesia intrusus non fuerit et tempore dato presencium non sit in ea alicui specialiter ius quesitum cum omnibus iuribus et pertinencijs suis auctoritate nostra conferas et assignes, inducens per te uel alium uel alios eundem Prziechonem uel procuratorem suum eius nomine in corporalem possessionem parrochialis ecclesie, juriumque et pertinenciarum predictorum et defendens inductum, ammoto exinde quolibet illicito dedecore ac faciens sibi de ipsius ecclesie fructibus, redditibus, prouentibus, iuribus et obuencionibus uniuersis integre responderi. Contradictores auctoritate nostra appellacione postposita compescendo, non obstante tam pie memorie Bonifacij(8) pape octaui, predecessoris nostri, quam alijs quibuscumque constitucionibus apostolicis necnon statutis et consuetudinibus monasterio et ordini predictorum contrarijs iuramento, confirmacione apostolica uel quacumque firmitate alia roboratis, aut si alicui super prouisionibus sibi faciendis de huiusmodi uel alijs beneficijs ecclesiasticis in illis partibus speciales uel generales predicte sedis uel legatorum eius litteras impetrarint eciamsi per eas ad inhabitacionem, reseruacionem et decretum uel alias quomodolibet sit processum, quibus omnibus prefatum Prcziechonem in assecucione dicte parrochialis ecclesie uolumus anteferri, sed nullum per hoc eis quoad assecucionem beneficiorum aliorum preiudicium genera [?] seu si venerabili fratri nostro archiepiscopo Pragensi et preposito dicti monasterij Plagensis pro tempore existenti uel quibusuis alijs commmuniter uel diuisim a dicta sit sede indultum, quod ad recepcionem uel prouisionem alicuius misericordie teneantur et ad id compelli aut quod interdici, suspendi uel excommunicari non possint, quodque de huiusmodi uel alijs beneficijs ecclesiasticis ad eorum collacionem, prouisionem, presentacionem seu quamuis aliam disposicionem coniunctim uel separatim spectantibus nulli ualeat prouideri per litteras apostolicas non facientes plenam et expressam ac de uerbo ad uerbum de indulto huiusmodi mencionem et qualibet alia dicte sedis indulgencia generali uel speciali cuiuscumque tenoris existat, per quam presentibus non expressam uel totaliter non insertam effectus earum impediri ualeat quorumlibet uel differri et de qua cuiusque tenore toto habenda sit in nostris litteris mencio specialis. Nos enim, si dictus Prcziecho ad hoc repertus fuerit ydoneus, ut prefertur ex nunc perinde irritum decernimus et inane, si secus super his a quoquam quauis auctoritate scienter uel ignoranter contigerit attemptari ac si die dato presencium eidem Prcziechoni ad hoc reperto idoneo de dicta parrochiali ecclesia cum interposicione decreti prouideri mandauissemus. Datum Rome, apud sanctum Petrum, sexto decimo kalendis octobris, pontificatus nostri anno quarto decimo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 231, S. 236-238