"Vnser willig vnd gehorsam dienst alczeit. Gnadiger herr(1), wir fuegen ewren gna[d zu] wissen, das vnsers gnadigen herrn von Walsee(2), hauptman der yeczund ze Haslach ist, wie offt den walt hat verslahen lassen. Nu sind etlich die ewren, die do ettliche gehager wider auff haben geschrotten, do durch wir oder die lantschafft schaden mochten nemen, wan wir ein guetcz vertrauen zu euch haben, jr schafft ein solichs nicht mit den ewren. Auff das pitt wir eure gnad, jr welt mit den von Multa(3) vnd anderen den ewren schaffen, dacz sie die gehager nicht auff schratten, vnd also ligen lassen, piß auff vnsern gnadigen herren, herren von Rosenwerg(4) vnd des von Walsee zuekunnfft. Auch laß wir ewer gnad wissen, das vnsers gnadigen herrn von Walsee anbolt, lat auff die gehager liegen, wez new weg oder staig do durch mocht, den maynt ez dacs ze nvczen. Nu wolt wir nicht gein das vnseres gnadigen herren von Rosenwerg lewt jn schaden kaeme, ob aber etbar schaden nam, mugt jr wol versten, das das an vnsser schuld war. Datum anno etc. lxviiij, am montag vor Thome. Von vns, dem richter, schoeppen vnd der ganczen gemayn ze Haslach."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 431, S. 477