"Ich Anna(1), weylenndt Eberharten Seebacher(2) saeligen witib: Bekenn, das fuer kam Ruedolf zw Golldoren(3), vnd bat mich mit vleys, das ich jm alls zechmayster vnd lehentrager sand Jacobs gotzhaws zw Rorbach zway tayl zehent auf aim guet jn der Jndern Oed(4), jn Sarlenspegkcher pfarr vnd Veldner landgericht gelegen, meiner lehenschafft geruechen zuuerleyhen. Das ich auf sein bete gethan, verlihen habe, vnd leych jm den wissentlich jn krafft des briefs, was ich zu recht daran verleyhen sol oder mag; allso, das er alls zechmayster vnd lehentrager des beruerten gotzhaws, vnd ain yeder lehentrager daselbs dye beruerten zway tayl zehents des bestymbten guets mit seiner zuegehoerung nun fuerbas von mir vnd meinen erben jn lehensweyse jnne haben, nuetzen, nyessen vnd nêmen, auch jn aller vordrung, so offt sich ain lehentrager oder dy herrschafft verwandelt, vnd wye offt ain stewer ainem lanndsfuersten oder des lanndes notturfft darauf geslagen, dauon gehorsam vnd gewaertig sein sullen, alls rechtlehens, lanndes Oesterreych ob der Enns recht ist angeuaerde. Zw vrkundt vnder meinem anhangunden jnsigill, doch mir vnd allen meinen erben an vnnserer lehenschafft, rechten vnd vordrungen vnuergriffen vnd an schaden. Der geben ist nach Cristj geburde vyerzehn hundert vnd jn dem ||
zwayvndnewzigisten jare, mitichens vor Bartholomej."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 513 (S 362), S. 573-574