"Wir Panngracz(1), abte zw Engertzzell: Bekhennen vnd thun khund allermenigclich offennlich mit disem brief, das für vns khomen ist der erwirdig in Gotte herr Sygmund(2), probste zum Schlegl, vnns fürbracht vnd anzaygt ain confirmacion von dem durchleuchtigisten fürsten vnd herrn, herrn Ferdynanden(3), ertzhertzogen in Österreich etc. vnnserm genedigisten herrn vnnd lanndsfürssten, vber all gedachts closters zum Slegl freyhayten, priuilegien vnd allt herkhomen lauttund, vnd vnns vleyssig angerueffen vnnd gebeten, ernente confirmacion vernewerung vnnd bestattung durch hernach benanten notaryen zu vydimiren vnd vnder vnnserm vnd vnnsers gotzhawss jnnsigl zuuerfertigen. Darauf haben wir in beysein mergemelts offen notarien vnd der hernach bestimbten zeugen solhe confirmacion wol ersehen, collacionirt vnd mit vleys abprobirt, dy wir mit gantzer volkhomenhayt befunden vnd erkhent, alls von wort zu wort lauttund, wye hernach volgt: ||
||
,Wyr Ferdynand [...] zwaynczigisten jare.‘ [Urk 579: 23.6.1522]||
||
Auf solh obgedachts herrn Sygmunden, probst zum Slegl, vleyssig bytten geben wir jme, auch dem gantzen conuent daselb der warhayt zu behelf vnd fürdrung disen brief vnd vydimus vnder vnnser vnnd vnnsers gotzhauss zu Engertzzell aigem hieranhangundem innsygl, auch mer genants offen notarien aigen handt vnd zaichen vnnderschriben vnd beuestigt, solher gebet zu mererm anzaigen vnnd glauben. Zeugen seyen dj geystlichen auch erbern herr Cristoff Edlinger(4), herr Larentz Lämpl(5), bed briester, Johannes Wichtl(6), clericer, vnd Anthonj Leytzenbroner(7), lay, all Bassawer bisthumbs. Geben in vnnserm closter Engertzzell(8), des neunten tags augustj, von Cristj geburd jm fünff zehen hundert vnd zwayundzwainczigisten jare."||
||
[NOTARIATSSIGNET] "Vnd wann jch, Ludwich Talhamer(9), priester Passauer pistumb, auss kaeserlicher macht offner geschworner notarj, södlichen vidimus von wort zw wort mit rechten vnd vngeczweifeltem original lautundt, vnd des erwirdigen herrn vnd vater der wirdigen stifft Engertzzel anhangendt sigel zw gelauben verfertigt, persondlich mit ob geschriben zeugen pey gewesen, hab gelesen vnd gesehen, vnd jn disen offnen form aines vidimus pracht. Darumben jch mich mit meiner aegen handt hab vnterschriben, mein gewöndlich notarj ampt zaechen hie her gemacht, erfodert, ersuecht vnd sunderlich gepeten."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 580 (S 416), S. 654-655