"Wir Ferdinannd(1), von Gots genaden zu Hungern, Behaim, Dalmatien, Croatien etc. kunig, jnfant in Hispanien, ertzhertzog zu Österreich, hertzog zu Burgundi, zu Steyr, Karndten, Crain vnd Wirtemberg etc. graue zu Tiroll etc. bekennen offennlich mit disem brief, als wir in bedacht der grossen not, so vnnssers heiligen cristenlichen glaubens erbfeindt der Turggen(2) halben vor augen enntslossen gewest, den vierdten taill aller prelaten vnd geistlichen ligunden guetter in vnnsern lannden antzugreiffen vnd zuuerkauffen, vnd zu widerstanndt der Turggen zu gebrauchen. Vnd aber vnnser furnemen aus besondern genaden gemildert vnd von den prelaten vnd geistlichen gemainklich in vnserm furstenthumb Österreich ob der Enns darfur angenomen, das sy vnns zu erhalttung des berurten vierdten taills jrer geistlichen guetter vierundzwaintzig tawsent guldin zu hilf wider die Turggen raichen vnd geben sollen. Dergestalt welher prelat vnd geistlicher das gellt so jme seines taills in betzallung der berurten vierundzwaintzig tawsent guldin gepurt in annder wege nicht betzallen konnte, das derselb von seinen ligunden guettern oder gültten souil verphenndten oder gar verkauffen mug, damit obgemelte suma volligclich vnd on abganng erstat werde. Das wir darauf dem ersamen geistlichen, vnnserm lieben andechtigen Sigmunden(3), brobst vnd conuent des closters zum Slegl genant, zuegeben bewilligt vnd erlaubt haben. Thun solhs auch wissenntlich mit disem brief, das sy zu bezallung jres gepurunden taills obgemelter hilf, so sich auf sibenhundert vnd zwaintzig guldin Reinisch lauffet, soferr sy solhen jren gepurunden taill sonnst nicht gehaben mogen, souil ligunde guetter oder gullt verphenndten oder verkauffen mogen, on vnnser vnd menigclichs jrrung vnd wider sprechen. Doch was stugg guetter oder gulten sy also verkomern oder verkauffen werden, die sollen sy vnns mit namen, wie hoch vnd wem solhe verphendtung oder verkauffung beschiecht, antzaigen, so wellen wir denselben kauffern auch besonnder bewilligungbrief daruber verttigen vnd geben vngeuerlich, vrkhundt dits brieffs. Geben in vnnser stat Lynntz, den dreissigisten tag des monats decembris, nach Cristi vnnsers lieben herrn gepurde im funnffzehen hundert vnd einganng des dreissigisten, vnnserer reiche im vierdten jaren."||
||
Eigenhändige Unterschrift unter der Plica: "Ferdinandus."||
||
Darunter: "H. (?) Hoffmann m. pr. Schatzmaister"||
||
Ganz unten: "Brobst zum Slegl consenßbrief, das er ettlich guetter zu bezallung seines gepurunden taills in die LLIIII gulden verphenden oder verkauffen mog."||
||
Rechts unten auf der Plica: "Ad mandatum domini regis proprium" (?)||
||
Darunter Sekretariatsvermerk: "Wratislawensis." (?)

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 597 (S 429), S. 669-670