"Ich Michael(1), aus Gottes füersehung brobste des wüerdigen gottshaus vnnser frawen Schlag: Bekhenn füer vnns, all meine nachkhumen offenntlich mit disem brief, wo der zuuernemben füerkhumbt, das füer mich khumen ist der beschaiten Oswolt Lebb(2), mein vnnterthan, zum Claffer sesshafft, vnd bate mich demüetigistes vleiß, das jch jme zway thaill zehet auf fünffthalb güetter am Claffer vnd Freindorf(3), zu beden meinen dörffern gelegen, dauor er mier alweg am dritten jar sechs schiling phening lehen gelt zu geben schuldig, gerichten zuuerleihen, welichen zehet vormals mein gewesster vnnterthan Veyt Spiller(4) zu Vlrichsperg zu lehen gehabt. Demnach hab jch sein demüetigs vnnd vleisigs gebet angesehen vnnd jme darauf ernanten zehet mit seiner rechtlichen zuegehörung hiemit jn habunder macht verlihen. Verleyhen jme den hiemit wissentlich in crafft ditz brieffs, was jch jme hierin von rechts wegen zuuerleyhen hab. Also das er mergemelten zehet in rechter lechens weis jnhaben, nützen vnnd niessen mag, als rechts lehens jm lanndt Ossterreich ob der Enns recht ist, doch mier vnnd meinen nachkhumen an meiner lechenschafft vorderung vnnd gerechtigkhait vnuergriffen vnd in albeg an schaden. Zu verkhundt mit meinem grossen anhangenten jnsigl verfertigt. Geben im gotshaus vnnser frawen Schlag, den dreyuntzwainzigisten dag januarj, nach Christj vnnsers herrn vnnd seligmachers gebuert im dausent funf hundert vnnd neunundsechzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 635 (S 459), S. 703-704