"Ich Wolffgang Winckhler(1) zu Winckhl, vnd jch Catharina sein eheliche hausfraw: Bekhenen fuer vns vnd all vnser erben, vnd thuen khundt offendtlich mit disem brieff, das wier recht vnd redlich verkhaufft vnd kheufflichen zu khauffen geben haben vnser obers gueth zu Winckhl(2), das Ödt Guett genandt, darauff wier heyslichen gebaudt haben, sambt aller derselben pillichen ein vnd zuegehörung, jn Waltkhircher pharr vnd Wäxenwerger landtgericht ligundt, vnd dem ehrwirdigen vnd edlen herrn Arsatio Schmidt(3), pharher vnd der zeyt jnhaber des beneficy auf der parkhirchen zu Haslach(4), mit der grundt obrigkhaydt vnderworffen, dem erbarn vnd fuernemben, vnserm eheleiblichen sun Thaman Winckhler(5), Anna seiner ehelichen hausfrawen vnd allen jeren erben, vmb ein suma gelts, wellicher wier von jnen zu rechter weil vnd zeyt an allen schaden erbarlich vnd an abgang mit parem guettem gelt entricht vnd pezalt sein worden. Demnach vnd hierauff, so mag ernender vnser lieber sun Thaman Winckhler getachtes gueth nun verrer seines gefallens nutzen vnd prauchen mit verkhauffen, verschaffen, versetzen vnd geben, wem er will. (Doch daz alle handlung vnd verwandlung mit vorwissen vnd verwilligung der vermelten grundtherschafft geschehe). Anders hette es nit stadt noch khrafft. Er mer ernender vnser lieber sun Thaman Winckhler soll sich auch jn allen herrn vodrungen vnd diensten gehorsamblich halten, wie seinem frumben, gethreuen vnderthan ehrlich vnd woll anstedt. Jch merernander Wolffganng Winckhler, vnd alle meine erben, sein des khauffes vnd aller seiner erben rechte gewer, schermb vnd fuerstandt fuer all rechtlich khrieg vnd ansprach, als offt es jenen noth vnd durfft geschiecht, vnd solliches jm landt Österreich ob der Enns recht vnd syth ist. Alles trewlich vnd vngeferlich. Des zu warem vrkhundt geben wier jnen vnd allen jeren erben disen khauff prieff, wellicher auf vnser gehorsamb pitten, jnhalt eines vbergebnen bedtprieff, mit des erwirdigen vnd edlen herrn Arsatio Schmidt, der zeyt pharherr vnd jnhaber des beneficy auf der parkhirchen zu Haslach, als grundtherrn aigenen hieranhangenden jnsigil (doch getachtem herrn pharhern vnd allen seinen erben vnd jnsigil, auch aller herrn vodrungen vnuergriffen vnd an schaden) verferdigt jst worden. Zeugen der sachen sein die erbern vnd fuernemben Steffan Mitterhoffer amb Mitterhoff(6), Wolff Scheich zu Neindling(7), vnd Georg Hoffelner zu Hoffeldt(8). Geschechen an der heylligen ||
dhrey khunig tag, nach Christy vnsers lieben herrn vnd seylligmachers gepurdt funffzehen hundert vnd jm acht vnd sibentzigisten ~ jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 647 (S 463), S. 712