Ich Chunrat Choestel, der wiltpraeter, und ich Chunigunt sein Hausvraw wir vergehen offenleichen an disem prief vnd tvn chunt allen den, die in sehent, lesent oder ho^erent lesen, die nv lebent vnd hernach chunftich sint, Daz wir mit gesampter hant vnd mit verdachtem muet zder zeit, da wir iz wol getvn mochten, verchauffet haben vnd ze rechtem chauff geben der erbern vrawen vron Elzbeten, Chunrades witiben des Metsieder dem got gnad, ain phunt wienner phenning geltes purchrechtes auf vnserm hause, daz da leit ze naechst Hainreichs haus des Neydechker an dem graben ze Wienn, daz vor dient dem erbern herren hern Hainreichen dem Prior zden Schotten ze Wienn zehen phenning ze gruntrecht vnd ain halbes phunt phenninge ze purchrecht, vnd dient auch hintz den Schotten ze Wienn ain phunt phenning purchrechtes ze drin zeiten in dem iar, und hintz sand Peter in unserr vrawen zeche ain halbes phunt vnd hintz den minnern prudern ain phunt phenning, abzelo^esen vm vier march silbers Wienner gewichtes. Daz vorgenant phunt geltes purchrechtes hab wir verchauffet, als vorgeschriben ist, der vorgenannten vron Elzbeten recht vnd redleichen vm nevndhalb phunt Wienner phenning, der wir gar vnd gaentzleichen gewert sein, vnd dazselb phvnt geltes schol man auch dienen zdrin zeiten in dem iar, an sand Michelstag achtzich phenning, zden weichnahten achtzich phenning, vnd an sand Jeorgen tag auch achtzich phenning, mit allem dem rechten, vnd man ander purchrecht dient in der stat ze Wienn. Iz schol auch di vorgnant vraw Elzbeth fu^erbaz ledichleichen vnd vreileichen mit demselben phunt geltes allen iren frumen schaffen, versetzen, verchauffen vnd geben, swem si wil, an allen irrsal vnd an allen chriech. Wir setzen vns auch vber dazselb phunt geltes purchrechtes recht gewern vnd scherm fu^er alle ansprach, als der stat recht ist ze Wienn. Vnd dorvber ze ainem offen vrchvnd vnd waren gezeug geb wir, ich vorgnanter Chunrat vnd ich Chunigunt sein hausvraw, der vorgnanten vrau Elzbethen disen prief fu^er vns vnd fu^er vnser erben versigilten mit des vorgnanten hern Hainreich’s insigel des Prior zden Schotten ze Wienn, der des vorgnanten hauses rechter gruntherr ist, vnd mit hern Mertins insigel, zden zeiten Capplan vnd Verweser vnserr vrawen Cappellen in hern Otten Haymen haus ze Wienn, vnd mit des Eberhartz insigel, zden zeiten statschreiber ze Wienn, di diser ding gezeug sint mit iren insigeln, wan wir selb niht aigens insigels haben. Der prief ist geben nach Christes gepurd dreutzehen hundert iar in dem fünf vnd dreizzigstem iar darnach, an dem Vreitag in der phingst wochen.

Source Fulltext: HAUSWIRTH, Schotten (=FRA II/18, 1859) S. 205-206