Ich Dyetreich der alt von Weizzenberch vnd ich Dietreich sein sun vnd alle unser Erben wir vergehen vnd tuen chunt allen den, di den Prief ansehent oder horent lesen, di nv lebent vnd hernach chunftig sint, daz wir mit verdahtem mvet vnd mit guetlichem willen aller unser Erben zv der zeit, do wir iz wol getuen mohten, haben ze chauffen geben dem Erbern Herren Apt Maritzen vnd aller seiner samnung vnser Vrowen Gotshans datz den Schotten ze Wienn vnsers rehten aygens anderhalb Lehen datz dem Grozzen Eberhartstorf mit alle dem nvtz vnd reht, daz darzv gebort, ze veld vnd ze dorff, versucht vnd vnuersucht, wie daz genant ist, als wir div gehabt haben in rehter aygens gewer, also haben wir in div geben ze rehtem, ledigen, vreyn aygen vmb viertzich phunt phenning Wienner mvnzz, der wir gar vnd gaentzlich gewert sein. Sev schuln auch furbaz mit dem egenanten anderhalben Lehen vnd waz darzv geboret, allen ir frum schaffen mit verchauffen vnd mit versetzen vnd geben, wem si wellen, mit vnserm guetem willen an allen irresal. Darvber durch ein bezzer sicherhait setzen wir vns egenanten, ich Dyetreich der alt von Weizzenberch vnd ich Dietreich sein svn vnd alle vnser Erben, dem egenanten Erbern Herren apt Maritzen vnd der Samnung gemain vnser Vrowen Gotshaus ze den Schotten ze Wienne des egenanten aygens der anderhalben Lehen ze Eberhartstorf vnd waz darzv gehoret, da weilent auffgesezzen ist Vlreich von Winchel, ze scherm vnd gewern für alle ansprache, als aygens reht ist in dem Land ze Osterreich. Nement si darvber dehainen schaden mit reht an dem offtgenanten aygen, den schul wir in ablegen vnd schuln daz haben auf alle dem guet, daz wir haben in Osterreich. Daz in di red also staet und vnzebrochen beleib, darvber geben wir, ich Dietreich der alt von Weizzenberch vnd ich Dietrich sein svn, disen Prief versigelt mit vnsern baiden Insigeln zv einem warn vrchund vnd staeten sicherhait diser sache. Der Prief ist geben datz Sand Polten nach Christez geburtt vber Dreutzehen Hundert Jar darnach in dem Sechs vnd dreizzigisten Jar des Phintztags vor dem Palmtag.

Source Fulltext: HAUSWIRTH, Schotten (=FRA II/18, 1859) S. 206-207