Ich Weychart von Mulbach, zv den zeyten amptman vnd phleger der Chappeln in der Purge ze Wyenne, vergich vnd tun chvnt allen den, di disen Prief lesent oder ho^erent lesen, di nv lebent oder hernach chvnftich werent, daz ayn chrieg gewesen ist zwischen den Erberen Mannen hern Velreychen von sand Pangretzen, Pharrer zv Hayemburch, vnd Hayemreichen dem Goltsmid von Nuernwerch in der Cherner strosse ze Wynne vmb ayn dienst ain phvnt Pu^erchrechtz, daz er ouf seinnem Hous guhabt hat der vorgnant her Velreych, vnd daz iem in dem drittem iar darouf versessen ist vnd des her Weychart pey den Minneren Bruedern Grvntherre were, also verre, daz si denselben chrieg paydenthalben prachten fuer mein Herren Hertzog Otten. Der schuef daz mit dem Erberen herren hern Ruedolfen von Arbuerch, zv den zeyten seinnem Hofmayster, man solde ir payder vrchvnde darvber ho^eren, der zwayr v^erchvnde hern Weychartz pei den minnern Brvedern vnd hern Vlreichs von sand Pangretzen. Vnd di wuerden dv da gulesen, also verre, daz mit recht da guuiel vnd ertaylt werde, daz her Weychart pey den minner Bruedern dhain recht an demselben gruntte nicht solde noch mecht guhaben, wan hern Vlreichs vrchvnd daz sagt, daz derselbe Grvnt elter were vnd mit recht guho^ert in di Chappellen der Puerch ze Wyen vnd daz phvnt Pu^erchrechtz ouf di Chappellen hintz sand Pangretzen guho^ert ze Wyenne, daz man alle iar dienen sol zv drin tegen in dem iar nach der Stat recht vnd des Landes. Vnd hat ouch sich der vorgnant her Weychart desselben Grvntz goussent vnd alles rechtes daran verzygen. Vnd zv ainnem offen vrchvnde diser sache vnd diser wandlung, daz di stet vnd vntzebrochen hinfuer weleyb, darvber gib ich vorgnanter Weychart von Mulbach disen Prief versigelt mit meinnem Insigel. Diser Prief ist gugeben do von Christes gupu^erd ergangen werden drevczehen hvndert iar darnach in dem sibenden vnd dreysgistem iar, an sand Hanstage des Ewangelisten.

Source Fulltext: HAUSWIRTH, Schotten (=FRA II/18, 1859) S. 209