Ich Maehthilt, weiln Chunrades wittib dez Swabs dem got genade, Michels hausurowe dez Maler, vergich vnd tu^en chunt allen den, die disen brief lesent oder ho^erent lesen, die nv lebent vnd hernach chu^enftich sint, Daz ich mit gu^etem willen, mit verdachtem mv^et vnd auch zu der zeit, do ich iz wol getu^on mochte, vnd mit meins Perchmaisters hant, Walchons zu^e den zeiten amptmann der herren von Paeurn, Recht vnd redleichen, ledichleichen vnd vnbetwungenleichen aufgegeben han meinen weingarten, der da leit ze Waerich an dem Gotzhausperige vnd sto^ezzet auf die alsse, dez ein Drittail eins Jeuchs ist, ze naehst hern Vlreichs weingarten dez Probstz, Purger ze Pazzawe, da man alle iar von dient den Herren hintz Paeurn fu^emf vnd viertzich wienner phenninge ze Perchreht, vnd hern Jansen von Chappelle ainen wienner phenninge ze voitreht vnd nicht mer, dem erbern Herren apt Mauritzen des Gotzhaus vnser vrowen datz den Schotten ze Wienne vnd dem Convent gemain dezselben Gotzhaus vnd allen irn nachchomen, fu^erbaz ledichleichen vnd vreileichen ze haben vnd allen irn frumen damit ze schaffen, verchauffen, versetzen vnd geben, swem si wellen, an allen irresal. Vnd bin auch ich vorgenantev Maehthilt dez egenanten weingarten ir rechter gewer vnd scherm fu^er alle ansprach, alz Perchrehtes recht ist vnd dez Landes recht ze O^esterreich. Vnd wand ich noch der vorgenant mein Perchmaister Walchon selber nicht aigener Insigil haben, darvmb so gib ich in disen brief zu^e einem offen vrchunde vnd zu einer ewigen vestnvnge diser sache versigilt mit meins Obristen Perchherren Insigil, dez erbern Herren apt Chunrades von Paeurn, der diser sache gezeuge ist mit seinem Insigil. Diser brief ist geben ze Wienne nach Christes gepurt Dreutzehen Hundert Iar darnach in dem Sechs vnd Dreizgisten iar, dez naehsten Mittichens vor sant Cholmans Tage.

Source Fulltext: HAUSWIRTH, Schotten (=FRA II/18, 1859) S. 208