Ich Chvnrat der Veriber von Haymbvrch vnd Ich Margret sein Hausvrowe Wir veriehen vnd tvn chvnt allen den, die disen prief lesent oder horent lesen, die nv lebent vnd hernach chunftig sint, daz wir mit vnserr Erben gvten willen vnd gvnst, mit verdachten mvte vnd mit gesampter Hant, nach vnserr pesten vrewende Rat, zv der zeit, da wir ez wol getvn mochten, vnd auch mit vnsers Grvntherren Hant, des Erbern Mannes hern Herbortes auf der Sevle, recht vnd redlichen verchauft haben vnseres rechten anerstorben Erbegvtes, vnser Haus, daz da leit in dem Ziechgezzelin pei sand Chlaren, vnd stozzet hinden an hern Jansen Haus von Vischamvnde, vnd swaz darzv geboret, davon man dient alle Jar ze Grvnthrecht vnd ze Pvrchrecht dem egenanten hern Herborten auf der Sevl ayn phunt Wienner phenninge vnd nicht mer, mit allem dem Nvtze und Rechte, als vns dazselbe Haus mit lo^ez vnd mit fvrtzichte ze vnserm Teile gevallen ist, vnd wir ez vnuersprochenlichen in Pvrchrechtes gewer herpracht haben, vmb vierdhalb vnd Dreizzig phunt phenninge Wienner Mvntze, der wir gar vnd gantz verricht vnd gewert sein, dem Erbern Manne Hermanne, zv den zeiten des Eberstorffer Schaffer, vnd vron Chvnigvnden seiner Hausvrowen vnd ir paider Erben, fvrbaz ledichlichen vnd vreilichen ze haben vnd allen im frvmen damit ze chaffen, verchauffen, versetzen vnd geben, swem sev wellen, als in daz wol chom vnd fuge an allen Irresal. Vnd durch pezzer sicherhait so setze wir vns, Ich vorgenanter Chvnrat der verber von Haymbvrch vnd Ich Margret sein Hausvrowe vnd ich Fridreich sein Pruder vnd Ich Vlreich der Gozzel, vnuerschaidenlichen mitsampt vnsern Erben dem Egenanten Hermanne, des Eberstorffer Schaffer, vnd vron Chvnigunden seiner Hausvrowen vnd Ir paider Erben vber daz vorgenante Haus vnd swaz darzv gehoret, alz vor geschriben stet, ze rechtem gewern vnd Scherm fvr alle ansprache, als Pvrchrechtes Recht ist vnd der Stat Recht ze Wienne. Vnd swaz in fvrbaz mit Rechte daran abeget, ob sev dehainen Chrieg oder ansprache daran gewonnen, von wem daz wer, davon sev schadehafte werden mochten, daz schulle wir in auzrichten vnd schullen daz haben vnuerschaidenlichen auf vns vnd auf allem vnserm Gvt, daz wir haben in dem Lande ze Osterreich, wir sein Lebentig oder Tode. Vnd daz der Chauf vnd dise Rede fvrbaz also stete sei, vnd wand wir selber aygener Insigel nicht enhaben, darvber so geben wir in disen prief ze einem offen vrchunde vnd ze ainer ewigen vestenunge versigelten mit des vorgenanten vnsers Grvntherren Insigel, hern Herbots avf der Sevl, vnd mit der Erbern Pvrger Insigel, hern Lewen des Nvzdorffer vnd hern Hainreichs des Linzekcher, die diser sache gezevg sint mit irn Insigeln, vnd verpinden vns vnder iren Insigeln, alles des ze laisten, daz vor geschriben stet, in allem dem Rechten, als ob vnser Insigel daran hienge. Diser prief ist geben ze Wienne nach Christes gepvrt Dreutzehen Hvndert Jar darnach in dem acht vnd Dreizzigisten Jar, an vnsers Herren Leichnames Tage.

Source Fulltext: HAUSWIRTH, Schotten (=FRA II/18, 1859) S. 214-215