Ich Vlreich der Trewe vnd ich Margret sein hansvrowe wir vergehen vnd tun chvnt allen den, die disen bri^ef lesent oder ho^erent lesen, die nv lebent vnd hernach chv^enftich sint, Daz wir mit vnser erben gutem willen vnd gvnst, mit verdachtem mv^et vnd mit gesampter hant, zv der zeit, do wir iz wol getu^en mochten, vnd mit vnsers Lehensherren hant, des edeln Hochgeborn Fv^ersten Hertzoge Albrechtes ze Osterreich, ze Steyr vnd ze Chernden, Recht vnd redleich verchauft vnd geben haben ayn Phunt vnd zwen phenninge Wienner mv^enzze Geltes, die da ligent ze Chrut auf vrbar Aekchern, mit allem dem nvtz vnd recht, alz wir dieselben gu^elt in Lehens gewer herpracht haben, vmb Sechs Phvnt vnd sechtzich phenninge Wienner mv^enzze, der wir gar vnd gaentzlich gewert sein, dem erbern manne Eysenreichen von Ritzendorf vnd seiner hausvrowen vron Ofmeyn vnd allen irn erben fv^erbaz ledichleichen vnd vreileichen ze haben vnd allen irn frumen damit ze schaffen, verchauffen, versetzen vnd geben, swem si wellen, an allen irresal. Vnd sein auch wir, ich Vlreich der Trewe vnd ich Margret sein hausvrowe vnd vnser erben, vnuerschaidenleich des vorgenanten Phunt vnd zwen phenninge geltes Eysenreichs von Ritzendorf vnd seiner hausvrowen vron Ofmeyn vnd irr erben recht gewern vnd scherm fv^er alle ansprach, alz Lehens recht ist vnd des Landes recht ze O^esterreich. Waer aber, daz si mit recht an derselben gu^elt dehainen chriege oder ansprach gewunne, von wem daz waer, swaz si dez schaden nement, daz si bei irn trewen gesagen mu^egen, daz suln wir in alles ausrichten vnd widerchern an alle ir mv^e vnd an allen irn Schaden, vnd suln auch si daz haben auf vns vnd auf allem vnsern gv^et, daz wir haben in dem Lande ze Osterreich, wir sein lebentich oder tode. Vnd geben in darv^eber disen brief zu einem warn vrchunde diser sache versigilt mit vnserm Insigil vnd mit meins vetern Insigil, hern Hainreichs des Trewen, der diser sache gezeuge ist mit seinem Insigil. Diser brief ist geben ze Wienne nach Christes gepurt drevtzehen Hundert iar darnach in dem Nevn vnd Dreizgisten iar, des naehsten Svntages vor sant Cholmans Tage.

Source Fulltext: HAUSWIRTH, Schotten (=FRA II/18, 1859) S. 216-217