Albertus, dei gratia episcopus Patauiensis, ad noticiam presencium et memoriam futurorum. Cum plantare sacram religionem et plantatam fouere modis omnibus debeamus, hoc profecto rite et ordinate prosequimur, dum monasteriorum et personarum inibi sub regulari obseruancia deo famulancium necessitatibus prouidentes eorum penurias congruis remediis, quantum possumus, subleuamus, ne ex defectu temporalium, sine quibus spiritualia diu non possunt subsistere, a contemplacionis ocio et cultus diuini feruore retrahantur. Hac igitur consideracione inducti, monasterium beate Marie Scothorum in Wyenna ordinis sancti Benedicti nostre dyocesis pro certis suis defectibus nobis expositis releuandis capellam Sancti Panchracii, sitam in curia ducum Wyenne, cui nulla imminet cura animarum, que eciam per abbatem monasterii predicti pleno iure hactenus est collata, ad consilium et seriosas instancias incliti principis domini Alberti ducis Austrie, Styrie et Carinthie, avvnculi nostri karissimi, eidem monasterio annectimus, incorporamus et vnimus, ita videlicet, quod cedente vel decedente rectore eiusdem cappelle abbas et conuentus monasterii prefati possessionem corporalem ipsius ac omnium jurium et pertinenciarum suarum licite apprehendere valeant ipsamque cum fructibus, redditibus et prouentibus suis in vsus monasterii sui conuertere et perpetuo retinere, saluo tamen, quod per fratres monasterii predicti aut presbyteros seculares, quemadmodum ipsi monasterio magis proficuum fuerit, ipsi capelle congrue deseruiatur sic, quod cultus diuinus et ministrorum numerus, prius ibidem habiti, in nullo diminuantur, omniaque onera ipsi capelle ex juribus papalibus, metropoliticis vel episcopalibus seu alia undecumque incumbencia integra et inuiolata absque diminucione qualibet deinceps sicut antea supportentur. In quorum omnium et singulorum testimonium presentes litteras fieri mandauimus sigilli nostri appensione roboratas. Datum apud sanctum Ypolitum anno domini M^o. CCC^o. XL^o., tercio Ydus Aprilis.

Source Fulltext: HAUSWIRTH, Schotten (=FRA II/18, 1859) S. 220