Ich Vlreich von Pergawe, zv den zeiten Hertzog Albrechts hofmaister in Osterrich, vnd mein Erben veriehen vnd tun chunt allen den, die disen prief lesent oder horent lesen, die nu lebent vnd hernach chunftich sint, Daz ich gehabt han siben schilling gelts Purchrechts auf Georgen Haus des Storklins, daz da leit auf der Newenbvrgerstrazze zenaehst Hainrihs Haus des Schreiber, der ich drey schilling Pvrchrechts gegeben han hern Vlreichen, zv den zeiten Pharrer ze Haimburch vnd Chapplan datz sand Pangretzen ze Wienne, ze widerwechsel vnd ze einem rechten Chaufgut gegen den drin schillingen gelts purchrechts, die er gehabt hat auf meinem Hause, daz leit gegen des Stuchsen haus vber auf den Hindern, die er von mir ver vol vnd ver gu^et genomen hat, als wir prief vnd Hantfesten gegeneinander darvber gegeben haben, fvrbaz ledichlichen vnd vreilichen allen seinen frvmen damit ze schaffen, als im daz wol chom vnd fu^ege, an allen irresal. Vnd bestetige im die vorgenanten Drey schilling gelts Purchrechts mit des Erwirdigen herren hant Abt Hainrichs von den Schotten ze Wienne, der desselben Haus Gruntherre ist, dem ez dint alle iar ze Gruntrecht vier Wienner phenninge. Vnd pin auch ich der vorgenanten Dreyr schilling gelts Purchrechts hern Vlreichs des Pharrer ze Haimbvrch rechter scherm vnd gewer, als abgechauftes Purchrechts recht ist vnd der Stat recht ze Wienne. Vnd gibe im darvber disen brief ze einem offen vrchunde vnd ze ainer ewigen vestenunge versigelten mit meinem insigil vnd mit des vorgenanten Gruntherren insigil, des Erwirdigen herren apt Hainrichs von den Schotten ze Wienne, vnd mit hern Weicharts insigil pey den Minnern Prudern vnd mit hern Chunrats insigel des Wyltwu^ercher, zv den zeiten Purgermaister ze Wienne, die diser sache gezeug sint mit iren insigeln. Diser prief ist geben ze Wienne nach Christs gepvrt Dreutzehen Hundert iar darnach in dem Virtzigistem Jar, an vnser Vrowen Tage der Schiedunge.

Source Fulltext: HAUSWIRTH, Schotten (=FRA II/18, 1859) S. 224