Wir Kathrey die Aptessinne vnd die Samnung gmain der Vrawen des Chlosters datz sand Nicla ze Wienn vergehen vnd tuen chunt allen den, die disen Prief lesent oder horent lesen, die nv lebent vnd hernach chûnftich werdent, Daz wir gehabt haben funf phunt Wienner phenning geltes purchrechtes, die man vns vnd vnserm Chloster die Erbern herren, der apt vnd der Conuent von den Schotten ze Wienn, dienen solten, von der gu^elte, die in Maister Hainrich von Gmu^end der Goltsmit, dem got gnad, geben het vnd ingeantwurt. Dieselben fünf phunt geltes Purchrechtes habent sie vns vnd vnserm Chloster auzgezaigt vnd widerlegt mit andern funf phunden wienner phenning geltes Purchrechtes auf weingarten, die da ligent auf irem aigein vor Stubentor, der dritlhalb phunt vnd ains min dreizzich phenning geltes ligent auf dem Jeus, vnd Newn schilling vnd ainlef phenning geltes ligent auf dem Rennweg, vnd Newn Schilling vnd dritthalber vnd vnd zwantzich phenning geltes ligent in den Werchlu^ezzen, die wir gar fu^er vol vnd fu^er gu^et von in gnomen haben ze ainem widerwechsel also, daz wir, oder swer die vorgnanten funf phunt geltes hat, den vorgnanten herren von den Schotten ze Wienn vnd irem Chloster dienen suln alle Iar an sand Michels tag zwen wienner phenning ze rechtem Gruntrecht, als der prief sagt, den sie vns darvber geben habent. Der vorgnanten funf phunt geltes Purchrechtes, die sie vns gewechselt habent, als vorgeschriben ist, sag wir sie vnd ir Chloster furbaz aller ding ledig vnd vrey. Wir sein auch furbaz ir recht scherm vnd gewern fu^er alle ansprach derselben funf phund geltes Purchrechtes, als abgeledigtes purchrechtes recht ist vnd der stat recht ze Wienn. Vnd geben in darvber disen prief ze ainer ewigen vestnung vnd gezeug des vorgeschriben widerwechsels versigelten mit vnsern Insigeln. Der geben ist nach Christes geburt vber dreutzehen hundert iar in dem Viertzigistem Iar darnach, an sand Thomans abent.

Source Fulltext: HAUSWIRTH, Schotten (=FRA II/18, 1859) S. 226-227