Ich Jans der Swob vnd ich Alhait sein Swester, vnd ich Leudolt der Pru^onner vnd ich Kathrey sein Hausvraw, vnd ich Anne vnd ich Margreth, derselben Kathrey swester, Wir vergehen vnd tuen chunt allen den, die disen prief lesent oder horent lesen, di nv lebent vnd hernach chunftich werdent, Daz wir den Chriech, der zwischen vns vnd dem Ernwirdigen herren apt Hainrich zden Schotten ze Wienn vnd seinem Conuent gewesen ist vm ainen Weingarten, der da leit an dem Gotshauschperg, des ain Trittail ains Jeuchartz ist, der weilent Chunrades des Swabes vnd Maechtilden seiner Hausvrawen gewesen ist vnd den emals derselb Chunrat vnd Maechtild sein Hausvraw durch ir paider sel willen dem Chloster zden Schotten ze Wienn geschaffet vnd geben habent, zv erbaer Leut schidung gelazzen haben. Vnd dieselben Schidleut habent also beschaiden, daz die vorgnanten herren von den Schotten gebent acht phunt Wienner phenning fu^er||
alle ansprach, die wir bieten auf den vorgnanten weingarten. Vnd derselben acht phund phenning sein wir verriecht vnd gewert gaentzleich vnd gar, vnd dorvm verzeichen wir vns fu^erbaz alles rechten vnd aller ansprach, die wir vnd vnser Erben gehabt haben oder fu^erbaz gehaben mo^echten hintz dem vorgnanten weingarten, also, datz di êgnanten herren datz den Schotten vnd ir nachchomen mit dem vorgnanten weingarten fu^erbaz ledichleich vnd vreileich vnd aigenleich allen irn frumen schaffen, versetzen, verchauffen vnd geben, swem si wellen, an allen irrsal vnd an allen chriech. Wir loben auch vnverschaidenleichen mitsampt vnsern Erben den vorgnanten herren zden Schotten den vorgnanten weingarten in rechter gewerschaft vreyn vnd schermen vor aller ansprach vnd fu^er allen chriech nach des Landes recht in O^esterreich. Vnd daz suln si haben auf vns vnd auf vnsern Erben vnd auf allem vnserm guet, swie daz genant ist, daz wir haben in dem Land ze O^esterreich, wir sein lebentig oder tod. Vnd wan wir selb aygenr Insigel nicht haben, des geben wir den egnanten herren zden Schotten ze Wienn disen prief zv ainem offenn vrchund versigiïten mit des Erbern gaistleichen herren Insigel apt Chunrades von Peurn, der des vorgnanten weingarten obrister Perchherr ist. Diser prief ist geben ze Wienn nach Cristes geburd dreutzehen hundert iar in dem vierzigstem iar darnach, an sand Cholmans tag.

Source Fulltext: HAUSWIRTH, Schotten (=FRA II/18, 1859) S. 225-226