Ich Fridreich der Helfhant vnd ich Ursula sein Hausvrowe Wir vergehen vnd tvn chvnt allen den, die disen brief lesent oder ho^erent lesen, die nv lebent vnd hernach chvnftich sind , Daz wir mit vnser erben gu^eten willen vnd gunst, mit verdachtem mu^et vnd mit gesampter hant, zv der zeit, do wir iz wol getvn mochten, recht vnd redleich verchauft vnd geben haben vnsers rechten aigens vnsern Pavmgarten, der da leit datz den Helfhants, mit alle dem nutz vnd recht, alz wir in in aigens gewer herpracht haben, vmb sibenthalb phunt wienner phenninge, der wir gar vnd gaentzleich gewert sein, meinem Pruder Jansen dem Helfhant vnd seinen erben fv^erbaz ledichleichen vnd vreyleichen ze haben vnd allen irn frumen damit ze schaffen, verchauffen, versetzen vnd geben, swem si wellen, an allen irresal. Vnd sein auch wir, ich Fridreich der Helfhant vnd ich Vrsula sein Hausvrowe vnd vnser erben, vnuerschaidenleich dez vorgenanten Pavmgarten meins Pru^eder Jansen vnd seiner erben recht gewern vnd scherm fv^er alle ansprach, alz aigens recht ist vnd dez Landes recht ze Osterreich. Waer aber, daz si mit recht an demselben Pavmgarten icht chrieges oder ansprach gewunnen, swaz si dez schaden nement, daz svln wir in alles auzrichten vnd widerchern an alle ir mve vnd an allen irn schaden, vnd svln auch si daz haben auf vns vnd auf allem vnsern gu^et, daz wir haben in dem Lande ze O^esterreich, wir sein lebentich oder tode. Vnd daz diser chauf fu^erbaz also staet vnd vnzerbrochen beleibe, darvmb so geben wir in disen brief ze einem warn vrchvnde vnd ze einer ewigen vestnunge diser sach versigilt mit vnserm Insigil vnd mit Ruprechts Insigil von Purstendorf vnd mit Jansen Insigil dez Maern, di diser sach gezeug sint mit irn Insigiln. Diser brief ist geben ze Wienne nach Christes gepurt dreutzehen Hvndert iar darnach in dem ayns vnd viertzgisten iar, dez nachsten Mittichens vor dem Palm Tage.

Source Fulltext: HAUSWIRTH, Schotten (=FRA II/18, 1859) S. 227-228