Wir Graf Chunrat von Schawnberg vnd all vnser erben vergehen offenlich vnd tun chunt mit disem brief allen den, die in lesent, sechent oder horent lesen, das wir gelten sulln dem Erwirdigen fürsten Abtt Hainreichen von den Schotten ze Wienn vnd seinem Conuent daselbs zwaintzig pfunt vnd hundert phunt wienner phenning vmb ein haws, das wir wider Sy gechauft haben, das da ligt in der Renngassen, das vor gewesen ist der Metinn, der got gnad, vnd sulln auch wir Si der vorgenanten phenning gar vnd gantz wern vnd richten zden Weichnachten, die schirift choment, an allen furtzug. Wir sulln auch vnd vnser erben alle Iar dauon raichen vnd dienen dem vorgenanten Abbt vnd seinem Gotshaus an sand Michels tag ze gruntrecht zwelif phenning wienner Munz. Wer aber, das wir sturben vnd abgiengen, davor got sei, vor dem tag, der ebenant ist, vnd das Si dannoch irr phenning vnd der werung vnberichtt wern, so sulln Si mit dem obgenanten haws allen irn frumen schaffen, verchauffen, versetzen vnd geben, wem Si wellen, an allen irresail, so in vnd irm Gotshaus das aller beste fuge. Vnd das die rede stete vnd vnuerchert beleibe, daruber geben wir in disen brief ze ainem warn gezeug diser Sache besigelten mit vnserm Insigil. Der brief ist geben nach Christes geburde Tausent vnd drewhundert Iar darnach in dem ainsvndvirtzigistem Iar, des nagsten Montags vor sand Matheus tag, des zwelifpoten vnd ewangelisten.

Source Fulltext: HAUSWIRTH, Schotten (=FRA II/18, 1859) S. 229