In nomine domini amen. Anno natiuitatis eiusdem millesimo trecentesimo quadragesimo secundo, indictione decima, mensis Marcii die prima, in presencia reuerendi in christo patris et domini, domini Hainrici abbatis monasterii sancte Marie Scotorum in Wienna ordinis sancti Benedicti Patauiensis diocesis, mei, notarii publici, et testium infrascriptorum discretus vir, dominus Martinus rector cappelle in domo consilii Wiennensis, per dei graciam mente ac sensu sanus, licet viribus corporis languens, extremum vite sue tempus bonis cupiens operibus preuenire, non compulsus nec coactus, sed de sua hona voluntate de rebus et bonis suis mobilibus et immobilibus fecit, ordinauit et edidit pro salute anime sue testamentum infrascriptum vltimam suam disponendo per omnia voluntatem. Primo quidem disposuit cappelle predicte quemdam librum missalem atque crucem argenteam nec non vineam sitam in Grintzing, Hevenstreit vulgariter nuncupatam. Item, vt anime sue memoria per fratres monasterii sancte Marie Scotorum predicti recenciori sollicitudine in perpetuum habeatur, deputauit atque dedit eidem monasterio vineam suam in monte nucum situatam, in eodem monasterio sui corporis eligens sepulturam. Insuper ordinauit, vt de bonis et rebus suis mobilibus, in quacumque specie seu quantitate existentibus, expense pro exequiis et obsequiis tumuli necessarie recipiantur, cum subtractus fuerit ab hac vita. Et, quicquid de eisdem rebus seu bonis superfuerit, in redempcione, absolucione seu liberacione quinque librarum denariorum Wiennensium census annui, pro quo predicta vinea in monte nucum, quam prefato monasterio Scotorum idem dominus Martinus nomine testamenti, vt premittitur, legauit, Sifrido dicto Minnganch ciui Wiennensi obligata existit, tribuatur. Hec autem omnia et singula prescripta discreto viro domino Alberto plebano in Marchgrafen Newsidel ac strenuo militi domino Vlrico aput fratres minores Wienne nec non honesto viro Sifrido dicto Minnganch predicto fideliter exequenda recommisit, volens ipsa rata et firma inuiolabiliter obseruari, si ipsum migrare contingeret ab hac luce. Acta sunt hec Wienne in curia Scotorum in stupa habitacionis supradicti domini Martini presentibus venerabilibus et religiosis viris, domino Hainrico abbate predicto, fratre Nicolao priore ecclesie Scotorum prefate, fratre Jacobo Parisiensi confessore curie ducis Austrie, fratre Vlrico socio ipsius nec non honorabilibus viris dominis magistro Andrea, vicario reuerendi in Christo patris et domini domini Alberti Patauiensis episcopi in spiritualibus generali, Ottone rectore cappelle sancte Marie In Litore Wienne, Alberto plebano in Marchgrafen Newsidel et Vlrico aput fratres minores predictis, Stephano plebano ad sanctam Margaretham et Jacobo publico et dicti magistri Andree notario testibus ad premissa vocatis specialiter et rogatis. Et ego Petrus, quondam Chonradi de Hallis Herbipolensis diocesis publicus auctoritate imperiali notarius, omnibus et singulis suprascriptis anno, indictione, mense, die ac loco, quibus supra, vna cum premissis testibus presens interfui eaque fideliter conscribens et in hanc formam instrumenti publici redigens, licet alias eciam supradicto domino Martino testatori similis sensus et intellectus instrumentum ipsius ac honorabilium virorum dominorum, magistri Andree, Ottonis rectoris cappelle sancte Marie in Litore, Vlrici militis aput fratres minores et Sifridi dicti Minnganch supranominatorum, sigillis consignandum tradiderim, vtrumque meo nomine ac signo solito consignari rogatus et specialiter requisitus.

Source Fulltext: HAUSWIRTH, Schotten (=FRA II/18, 1859) S. 233-234