Philippus dei gratia Salzpurgensis ecclesie archiepiscopus apostolice sedis legatus. Vniuersis Christi fidelibus per salzburgensem Metropolim constitutis. ad quos litera hec peruenerit. Salutem in domino Jesu Christo. Quoniam ut ait apostolus. omnes stabimus ante tribunal Christi, recepturi prout gessimus in corpore, siue bonum fuerit siue malum. oportet nos diem messionis extreme operibus misericordie preuenire. ac in terris eternorum intuitu seminare, ut multiplicato fructu in celis recolligere mereamur. firmam spem tenentes et fiduciam. quoniam qui parce seminat. parce et metet. et qui seminat in benedictionibus. de benedictionibus et metet uitam eternam. Cum igitur monasterium in Sytanstetin propter exustionem nouiter corruerit. nee preter uestra et aliorum Christi fidelium grata subsidia caritatis nequeat reparari. uniuersitatem uestram monemus in domino et hortamur. ac etiam in remissionem peccatorum uestrorum iniungimus. quatenus ad reparationem dicti monasterij uestram elemosinam erogetis. ut per hec et alia bona. que deo inspirante feceritis. eternum possitis premium optinere. Nos etiam attendentes. quod particeps bonorum efficitur. qui se boni operis statuit adiutorem. omnipotentis dei ac patronorum Petri et pauli apostolorum. Rudberti et Virgilij confessorum confisi gratia. omnibus qui de bonis suis in subsidium reparationis prefati monasterij dederint. XX^ti dies uenalium et totidem dies criminalium de iniuncta ipsis penitentia in domino relaxamus. Data apud Rastat, anno domini M. C. LIIII.

Source Fulltext: RAAB, Seitenstetten (=FRA II/33, Wien 1870) S. 50-51